19 сакавіка, Мінск /Кар. БЕЛТА/. У Італіі зафіксавалі рэкордную колькасць ахвяр каранавіруса за суткі. Колькасць памерлых вырасла на 475, паведамляюць інфармагенцтвы са спасылкай на кіраўніка службы грамадзянскай абароны Італіі Анджэла Барэлі.
Паводле яго інфармацыі, усяго ў краіне загінулі 2978 чалавек, аднак колькасць тых, хто выздаравеў, таксама павялічылася на 1084 чалавекі, іх агульная колькасць дасягнула 4025. Найбольшы прырост выпадкаў COVID-19 зафіксаваны ў Ламбардыі, дзе памерлі 319 чалавек. "Агульная колькасць інфіцыраваных у краіне на гэты момант складае 28 710, на 2 648 больш, чым напярэдадні. Я сказаў бы, што тэмп заражэння захоўваецца, тады як смяротнасць расце", - удакладніў Анджэла Барэлі. Такім чынам, з пачатку ўспышкі ў Італіі заразіліся больш за 35 713 чалавек, уключаючы тых, хто вылечыўся, і тых, хто памёр.
Паводле апошніх даных, у свеце каранавірусам заразіліся больш за 214,8 тыс. чалавек, больш за 8,7 тыс. памерлі, а 83,3 тыс. вылечыліся. Італія займае другое месца пасля Кітая (81102) па колькасці заражаных (35713 выпадкаў). Успышка захворвання пачалася ў канцы снежня 2019 года ў кітайскім горадзе Ухань. Аднак за апошнія суткі ва Ухані не было зарэгістравана новых выпадкаў заражэння каранавірусам.-0-
