22 сакавіка, Мінск /Кар. БЕЛТА/. Прэм'ер-міністр Ірака Адэль Абдул-Махдзі аб'явіў у краіне трохдзённую нацыянальную жалобу ў сувязі з крушэннем парома каля Масула. Трагедыя забрала жыцці як мінімум 94 чалавек, паведамляе BBC.
Міністэрства юстыцыі Ірака пасля здарэння ў Масуле загадала арыштаваць дзевяць работнікаў паромнай кампаніі, якой прыналежала затанулае судна. Прэм'ер-міністр распарадзіўся правесці расследаванне інцыдэнту і падкрэсліў, што ўсе вінаватыя будуць прыцягнуты да адказнасці. Таксама Адэль Абдул-Махдзі наведаў бальніцы, дзе знаходзяцца пацярпелыя і даручыў аказаць неабходную дапамогу жывыўшым і сем'ям ахвяр трагедыі. Прэм'ер-міністр Ірака заявіў, што гэта трагедыя - адна з самых страшных у краіне за апошнія гады.
Спецыяльны прадстаўнік Генеральнага сакратара ААН па Іраку Жанін Хеніс-Пласар назвала здарэнне жудаснай трагедыяй. "Нашы сэрцы звернуты да сем'яў і сваякоў ахвяр", - сказала яна.
21 сакавіка на рацэ Тыгр недалёка ад іракскага горада Масул патануў пасажырскі паром. На судне знаходзілася каля 200 чалавек, не менш за 94 з іх патанулі (сярод загінулых - 19 дзяцей і 61 жанчына), яшчэ 55 чалавек выратаваны. Паром накіроўваўся да турыстычнага вострава Ум-Рабаен для святкавання Наўруза - усходняга Новага года. Паводле папярэдняй версіі, прычынай крушэння стала перагружанасць парома. Большасць з тых, хто знаходзіўся на борце, не ўмелі плаваць.-0-