21 ліпеня, Мінск /Кар. БЕЛТА/. У Індыі зафіксаваны першы выпадак смерці чалавека ад птушынага грыпу, паведамляе газета The Times of India.
Паводле звестак медыкаў, памёр 11-гадовы хлопчык, які паступіў з высокай тэмпературай і кашлем у бальніцу штата Хар'яна 2 ліпеня. "Мы думалі, што ў яго COVID-19. Але калі тэсты аказаліся адмоўнымі, далейшыя даследаванні ўстанавілі, што хлопчык пакутаваў ад інфекцыі, выкліканай вірусам птушынага грыпу", - паведамілі ў бальніцы.
За апошнія 15 гадоў у Індыі адбылося мноства ўспышак птушынага грыпу, якія пераважна закранулі свойскую птушку. Аднак выпадкаў смерці сярод людзей ад гэтай хваробы не было.
Такое развіццё падзей выклікала трывогу ў спецыялістаў грамадскай аховы здароўя краіны. Цяпер праводзіцца ўсталяванне кантактаў у мэтах выяўлення людзей, якія маглі знаходзіцца ў непасрэднай блізкасці з хлопчыкам. Урачам і медсёстрам, якія лячылі пацыента, параілі ізалявацца і паведамляць аб такіх сімптомах, як боль у горле, чханне і насмарк.
Птушыны грып сустракаецца рэдка сярод людзей, але калі ён заражае чалавека, рызыка смерці вельмі высокая. Паводле некаторых даследаванняў, узровень смяротнасці людзей ад птушынага грыпу дасягае 60 працэнтаў. Як і ў выпадку сезоннага грыпу, у групе рызыкі знаходзяцца цяжарныя жанчыны, людзі з аслабленай імуннай сістэмай і пажылыя людзі.-0-