18 ліпеня, Мінск /Кар. БЕЛТА/. У Індыі стартавалі прэзідэнцкія выбары. Сёння калегія выбаршчыкаў праводзіць галасаванне. На пасаду кіраўніка дзяржавы прэтэндуюць два кандыдаты - Драўпадзі Мурму ад Нацыянальна-дэмакратычнага альянсу і Яшвант Сінха ад партыі "Усеіндыйскі Трынамул", паведамляе ТАСС.
Адзначаецца, што ў калегію ўваходзяць дэпутаты дзвюх палат парламента краіны: ніжняй і верхняй, а таксама прадстаўнікі рэгіянальных парламентаў з 28 штатаў і дзвюх саюзных тэрыторый. Усяго 4,8 тыс. чалавек.
Канчатковы падлік галасоў будзе праходзіць у сталіцы, куды прывязуць усе бюлетэні, 21 ліпеня. Падлік - даволі складаны працэс, паколькі голас кожнага выбаршчыка мае розную "каштоўнасць" - у залежнасці ад насельніцтва штата, які ён прадстаўляе.
Паведамляецца, што тэрмін паўнамоцтваў цяперашняга прэзідэнта Рама Натха Кавінда завяршаецца 24 ліпеня, і на аснове Канстытуцыі да названага чысла павінен быць ужо выбраны новы прэзідэнт, які 25 ліпеня прынясе прысягу.-0-
