7 верасня, Мінск /Кар. БЕЛТА/. У Грэцыі ўрачоў і іншых медыцынскіх работнікаў будуць штрафаваць за выдачу фальшывых пасведчанняў аб вакцынацыі або выздараўленні ад COVID-19 на 5 тыс. еўра. Аб гэтым паведамляе газета Ekathimerini.
Адпаведную папраўку ў заканадаўства прадставіла парламенту Міністэрства аховы здароўя Грэцыі. Адзначаецца, грашовае спагнанне таксама пагражае асобам, выкрытым у выкарыстанні такіх фальшывых сертыфікатаў.
Жорсткія штрафы таксама прадугледжаны для кіраўнікоў медыцынскіх устаноў і дамоў састарэлых, што прадаўжаюць наймаць на работу грамадзян, якія не прайшлі вакцынацыю, паколькі гэта парушае ўрадавыя пастановы. Работадаўцам пагражае штраф ад 10 да 50 тыс. еўра за кожнага невакцынаванага супрацоўніка. Сума штрафу будзе павялічвацца да 20-200 тыс. еўра за кожнае паўторнае правапарушэнне.
Згодна з заканадаўствам Грэцыі, усе медыцынскія работнікі ў краіне павінны быць вакцынаваны ад COVID-19. Акрамя таго, вакцынацыя з'яўляецца абавязковай для педагагічных калектываў і студэнтаў медыцынскіх універсітэтаў, каледжаў, школ медсясцёр. Выкладчыкі, якія адмовяцца вакцынавацца, будуць адхілены ад выканання абавязкаў без захавання заработнай платы да таго часу, пакуль не зробяць прышчэпку.-0-
