20 красавіка, Мінск /Кар. БЕЛТА/. У Германіі рост цэн на паліва ў сакавіку дасягнуў рэкордных значэнняў за апошнія 50 гадоў, паведамляе ТАСС са спасылкай на Федэральнае статыстычнае ведамства ў Вісбадэне.
У сакавіку бягучага года спажыўцам давялося плаціць прыкладна на 41,9 працэнта больш за бензін прэміум-класа і на 62,6 працэнта больш за дызельнае паліва, чым у мінулым годзе. Кошт светлага пячнога мазуту павялічыўся на 144 працэнты ў параўнанні з аналагічным перыядам 2021 года. У цэлым паліва падаражэла на 47,4 працэнта.
У ведамстве адзначылі, што асноўнымі прычынамі такога ўзлёту цэн сталі сітуацыя вакол Украіны і пандэмія каранавіруса.
Аналітыкі ўстанавілі, што нават падчас крызісаў цэн на нафту ў 1973-1974 і 1979-1980 гадах, а таксама падчас фінансавага крызісу 2008-2009 гадоў рост цэн быў не такім значным. Кошт газу таксама павышаўся не так імкліва.
Рост цэн на імпартуемы газ на 256,5 працэнта ў лютым прывёў да таго, што цэны на блакітнае паліва цяпер узляцелі да беспрэцэдэнтнага ўзроўню.
Раней агенцтва DPA паведаміла, што рост цэн на энерганосьбіты на фоне сітуацыі ва Украіне прывядзе да значнага павышэння расцэнак на электраэнергію для прыватных спажыўцоў у Германіі. Нямецкія пастаўшчыкі электраэнергіі, якія адказваюць за 13 млн дамашніх гаспадарак, ужо заявілі аб павышэнні тарыфаў у красавіку, маі і чэрвені ў сярэднім на 19,5 працэнта. У сярэднім рост цэн на газ складзе 42,3 працэнта.-0-
