14 снежня, Мінск /Кар. БЕЛТА/. У Гаіці ў горадзе Кап-Аіцьен адбыўся ўзрыў цыстэрны з гаручым, у выніку чаго загінулі як мінімум 40 чалавек, яшчэ дзясяткі паранены. Аб гэтым паведамляе выданне Le Nouvelliste.
Прадстаўнік мясцовых улад паведаміў, што інцыдэнт адбыўся ў ноч на 14 снежня, калі аўтацыстэрна з гаручым трапіла ў ДТЗ. Калі мясцовыя жыхары сабраліся каля фуры, каб набраць гаручае, адбыўся ўзрыў.
Як расказалі ратавальнікі, у непасрэднай блізкасці ад агню на зямлі ляжала 40 апаленых цел, сярод іх некалькі жанчын і дзяцей. "Мы далёкія ад ацэнкі на гэты момант, таму што ў згарэлых дамах напэўна ёсць яшчэ смяротныя выпадкі", - адзначыў адзін з пажарных.-0-
