25 лістапада, Мінск /БЕЛТА - ТАСС/. У выніку паводкі, што абрушылася на паўднёвы ўсход Францыі, загінулі чатыры чалавекі, паведамляе французскі тэлеканал BFM.
Ратавальнікі 24 лістапада знайшлі ў раёне горада Танерон аўтамабіль з целамі пажылой пары - мужчыны і жанчыны. Машына знаходзілася на дне яра, куды была скінута моцнымі патокамі вады.
Раней ратавальнікі знайшлі целы двух іншых людзей. Адзін з іх патануў, калі ў час эвакуацыі перакулілася лодка выратавальнай службы, другі загінулы знойдзены ў аўтамашыне. Сярод прапаўшых без вестак - 78-гадовы мужчына, які пасля выхаду са свайго дома быў збіты з ног і знесены плынню вады.
За мінулыя двое сутак у чатырох дэпартаментах на поўдні і паўднёвым усходзе Францыі выпала двух-трохмесячная норма ападкаў. Месцамі іх узровень перасягаў 330 мм. Гэта прывяло да выхаду рэк з берагоў, сыходжання апоўзняў, затаплення вуліц гарадоў, нават такіх вялікіх, як Каны і Ніца.
На выратаванне насельніцтва кінуты больш як 1,6 тыс. супрацоўнікаў пажарнай службы, работнікаў сістэмы грамадзянскай абароны. Пры дапамозе верталётаў выратаваны з затопленых дамоў некалькі дзясяткаў чалавек. Некалькі тысяч чалавек вымушаны былі пакінуць сваё жыллё і правесці ноч у выдзеленых ім залах школ і мэрый.-0-