27 студзеня, Мінск /Кар. БЕЛТА/. Па закліку нацыянальных прафсаюзаў больш за 10 працэнтаў супрацоўнікаў французскай сістэмы адукацыі далучыліся да забастоўкі, якая прайшла ў знак пратэсту супраць умоў працы ў перыяд пандэміі каранавіруса, паведамляе ТАСС.
Паводле даных улад, у забастоўцы прынялі ўдзел 11 працэнтаў служачых, а паводле даных прафсаюзаў - да 40 працэнтаў. Удзельнікі выступілі за паляпшэнне ўмоў працы і павышэнне зарплаты за работу падчас пандэміі. Акрамя забастоўкі некалькі тысяч работнікаў сферы адукацыі таксама выйшлі на дэманстрацыі ў вялікіх французскіх гарадах - Парыжы, Марселі, Бардо, Тулузе, Грэноблі.
Як перадае карэспандэнт ТАСС, у Парыжы дэманстранты прайшлі маршам ад Люксембургскага палаца да будынка Міністэрства адукацыі. У калоне пратэстуючых таксама знаходзіліся студэнты, якія патрабавалі аднаўлення заняткаў ва ўніверсітэтах, прыпыненых уладамі ў сувязі з распаўсюджваннем інфекцыі. На плакатах прысутных можна было заўважыць лозунгі "Больш санітарных мер - больш заняткаў".
Генеральны сакратар Усеагульнай федэрацыі работнікаў адукацыі Бенуа Цест адзначыў, што настаў вырашальны момант для занятых у сферы адукацыі. "Неабходна падтрымаць настаўнікаў, якія выказваюць незадаволенасць умовамі працы і ўзроўнем зарплаты, а таксама недастатковымі санітарнымі мерамі ва ўмовах распаўсюджвання каранавіруса", - падкрэсліў Бенуа Цест.
Прадстаўнік прафсаюза школьных медсясцёр Саф'я Гурэшы ў эфіры радыёстанцыі France Info таксама звярнула ўвагу, што "ў сістэме адукацыі налічваецца толькі 7,7 тыс. медработнікаў, якія адказваюць за здароўе амаль 13 млн школьнікаў і 2,3 млн студэнтаў. "Мы не можам зразумець, чаму дзяржава не павялічвае колькасць гэтага персаналу", - заўважыла Саф'я Гурэшы.-0-
