16 снежня, Мінск /Кар. БЕЛТА/. У 2018-2019 гадах толькі адной краіне ў Еўрапейскім рэгіёне ўдалося цалкам выканаць план Сусветнай арганізацыі аховы здароўя (СААЗ) па вакцынацыі пажылога насельніцтва ад грыпу - Беларусі. І толькі чатыры краіны выканалі яго на 60 працэнтаў - Расія, Вялікабрытанія, Ірландыя і Партугалія, паведамляе Цэнтр навін ААН.
Згодна са стандартамі СААЗ, імунізацыю супраць грыпу ў кожнай краіне павінны прайсці 75 працэнтаў пажылых людзей. Аднак, паводле даных арганізацыі, у 2018-2019 гадах у палове краін Еўрапейскага рэгіёна СААЗ гэты паказчык склаў менш як 35 працэнтаў. СААЗ таксама адзначыла, што ў некаторых краінах няма механізмаў маніторынгу вакцынацыі на ўзроўні асобных груп насельніцтва.
"У гэтай сферы, вядома, яшчэ шмат што трэба зрабіць. Штогод у Еўрапейскім рэгіёне рэгіструюць да 60 тыс. выпадкаў смерці ад рэспіраторных захворванняў, звязаных з грыпам, і вакцынацыя дапаможа істотна знізіць гэты паказчык", - паведаміў прадстаўнік СААЗ Рычард Пібодзі.
У барацьбе з грыпам асаблівую ўвагу, падкрэсліваюць эксперты, варта надаваць імунізацыі медыцынскіх работнікаў. Толькі ў чатырох краінах рэгіёна паказчык вакцынацыі медперсаналу быў высокім - у Беларусі, Арменіі, Казахстане, Малдове і Расіі, там ён склаў больш за 80 працэнтаў. У астатніх краінах, уключаючы развітыя, апошнія гады імунізацыю праходзілі менш як 50 працэнтаў медработнікаў.-0-
