21 красавіка, Мінск /Кар. БЕЛТА/. Паліцыя Берліна затрымала больш за 40 дэманстрантаў на акцыі супраць каранцінных мер, паведамляе газета Berliner Zeitung.
У акцыі пратэсту прынялі ўдзел больш за 8 тыс. чалавек. Многія ўдзельнікі былі без ахоўных масак і не выконвалі сацыяльную дыстанцыю. У сувязі з гэтым паліцыя аб'явіла мітынг завершаным і па гучнагаварыцелі заклікала ўдзельнікаў разысціся. Аднак дэманстранты праігнаравалі заклік.
Паміж удзельнікамі акцыі і паліцыяй адбываліся сутыкненні. Таксама адзначаецца, што пратэстуючыя кідалі ў паліцэйскіх бутэлькі.
На выпадак неабходнасці каля Брандэнбургскіх варот знаходзіцца два вадамёты. Паводле даных берлінскай паліцыі, увогуле на месцы правядзення акцыі дзяжураць 2,2 тыс. паліцэйскіх.
Паводле даных ТАСС, сёння Бундэстаг разглядае прапанаваныя ўрадам ФРГ папраўкі да закона аб абароне ад інфекцыйных захворванняў, якія прадугледжваюць увядзенне адзіных агульнафедэральных правіл у выпадку пагаршэння эпідэміялагічнай абстаноўкі.-0-
