21 кастрычніка, Мінск /Кар. БЕЛТА/. Спад у сусветным гандлі з-за пандэміі каранавіруса складзе ў 2020 годзе 7-9 працэнтаў у параўнанні з мінулым годам. З такім прагнозам выступіла Канферэнцыя ААН па гандлі і развіцці (ЮНКТАД), паведамляе ТАСС.
"ЮНКТАД прагназуе на 2020 год спад у глабальным гандлі ад 7 да 9 працэнтаў у вартасным выражэнні, нягледзячы на прыкметы ажыўлення ў трэцім квартале", - адзначаецца ў інфармацыйным бюлетэні арганізацыі.
Па выніках трэцяга квартала 2020 года ў сусветнай камерцыі зафіксавана пяціпрацэнтнае скарачэнне ў параўнанні з аналагічным перыядам мінулага года. Гэты вынік, аднак, істотна лепшы, чым у другім квартале, калі спад дасягнуў 19 працэнтаў, тлумачаць эксперты. Згодна з папярэднімі прагнозамі на чацвёрты квартал, выбрацца з чырвонай зоны сусветнаму гандлю не атрымаецца і паказчыкі будуць на 3 працэнты ніжэйшыя, чым у чацвёртым квартале 2019 года.
У ЮНКТАД звяртаюць увагу на "характэрнае ажыўленне гандлю ў Кітаі". "Экспарт гэтай краіны, які зведаў спад у першыя месяцы пандэміі, стабілізаваўся ў другім квартале і моцна вырас у трэцім", - гаворыцца ў бюлетэні. Эксперты прагназуюць для КНР па выніках 2020 года рост гандлю амаль на 10 працэнтаў. "У адрозненне ад іншых буйных эканомік кітайскі імпарт стабілізаваўся ў ліпені і жніўні і вырас на 13 працэнтаў у верасні", - канстатуюць у ЮНКТАД.
Гандаль медыцынскімі матэрыяламі, якія маюць адносіны да барацьбы з каранавірусам, вырас з красавіка ў сярэднім больш як на 50 працэнтаў. Пры гэтым найбольшую выгаду з гэтага росту атрымалі, згодна з інфармацыйным бюлетэнем, перш за ўсё краіны з высокім узроўнем даходу на душу насельніцтва.-0-
