13 чэрвеня, Мінск /Кар. БЕЛТА/. У Слюдзянскі раён Іркуцкай вобласці для эвакуацыі турыста, які сарваўся са скалы на адным з хрыбтоў Хамар-Дабана, выляцеў верталёт з ратавальнікамі. Аб гэтым інфармуе ТАСС са спасылкай на прэс-службу ГУ МНС Расіі па Іркуцкай вобласці.
Інцыдэнт здарыўся ўвечары 12 чэрвеня. Ратавальнікі МНС у час вучэбна-трэніровачных збораў знайшлі мужчыну, які сарваўся са скалы на адным з хрыбтоў Хамар-Дабана. Пацярпеламу аказалі першую дапамогу і разбілі лагер на месцы, паколькі з-за сур'ёзных траўмаў яго нельга было транспартаваць на насілках.
"Сёння раніцай у Слюдзянскі раён вылецеў верталёт Мі-8 МНС Расіі з ратавальнікамі Байкальскага пошукава-выратавальнага атрада для эвакуацыі пацярпелага з цяжкадаступнай мясцовасці", - гаворыцца ў паведамленні.
Гэты горны масіў - адзін з найстаражытных на планеце, яго працягласць - больш за 350 км.-0-
