14 снежня, Мінск, /Кар. БЕЛТА/. Украіна ўпершыню за гады незалежнасці апусцілася на апошняе месца ў Еўропе па ўзроўні ВУП на душу насельніцтва. Аб гэтым заявіла кіраўнік украінскай партыі "Бацькаўшчына" Юлія Цімашэнка ў час выступлення ў Вярхоўнай радзе, паведамляецца на афіцыйным сайце партыі.
Паводле слоў Юліі Цімашэнка, энергетычны крызіс ва Украіне ўжо выклікаў рост цэн і інфляцыю. "Вы не ўяўляеце, што цяпер адбываецца з бізнесам, які не можа плаціць ні па рахунках за газ, які каштуе ад 42-49 грыўняў за кубаметр, ні за ацяпленне, ні за электраэнергію, якая расце ў цане кожны дзень. Як вынік, у нас каласальная інфляцыя ў краіне, якую скрываюць у лічбах, але людзі яе бачаць на прылаўках магазінаў. Цэны ўжо непасільныя не толькі для пенсіянераў, але і часткі сярэдняга класа", - падкрэсліла Юлія Цімашэнка.
Паводле яе слоў, рост цэн адчувае кожная ўкраінская сям'я, таму Вярхоўная рада павінна тэрмінова ўмяшацца ў сітуацыю.
"Я хацела б, каб мы неадкладна абмеркавалі такое пытанне, таму што гэта непасрэдна б'е па даходах кожнай сям'і. І на гэтым фоне не адбываецца індэксацый ні заработкаў, ні пенсій, ні сацыяльных выплат. Беднасць, з якой вы прапаноўвалі скончыць, не проста закансервавана - мы ўпершыню ў гісторыі незалежнасці Украіны выйшлі на апошняе месца на еўрапейскім кантыненце па ВУП. І аб гэтым усе вы павінны даваць справаздачу і расказваць людзям", - упэўнена лідар "Бацькаўшчыны".-0-
