3 студзеня, Мінск /Кар. БЕЛТА/. Цана газу ў Еўропе ў ходзе першых біржавых таргоў у 2022 годзе паднялася вышэй за $900 за тыс. куб.м, сведчаць даныя лонданскай біржы ІCE, паведамляе ТАСС.
Цана лютаўскага ф'ючарса на хабе TTF у Нідэрландах вырасла да $933 за 1 тыс. куб.м, або 79,5 еўра за МВт·гадз.
Агульны рост кошту газу з пачатку таргоў складае каля 13 працэнтаў.
21 снежня 2021 года біржавая цана газу ў Еўропе ўпершыню ў гісторыі пераадолела адзнаку $2000 за тыс. куб.м на фоне надыходзячых халадоў і анамальна нізкіх запасаў у еўрапейскіх ПСГ. Аднак у наступныя дні цана скарэкціравалася на фоне аднаўлення ветрагенерацыі ў Еўропе і навін аб тым, што колькасць танкераў, якія перавозяць ЗПГ з ЗША ў Еўропу, павялічылася на трэць. Такім чынам, цана газу закрыла таргі ў 2021 годзе спадам ніжэй за $800.
Кошт ф'ючарсаў на хабе TTF валацільны з-за спекуляцыйнага фактару і не адлюстроўвае рэальную цану фізічных паставак у Еўропу. Паводле даных "Газпрама", сярэдні кошт экспарту газу па кантрактах у 2021 годзе складзе $280 за тыс. куб.м.-0-
