20 ліпеня, Мінск /Кар. БЕЛТА/. Прэзідэнт ЗША Дональд Трамп заявіў аб гатоўнасці ўвесці пошліны на ўвесь кітайскі імпарт, калі ў гэтым узнікне неабходнасць, паведамляе ПРАЙМ.
"Я гатовы пайсці на $500 млрд, - сказаў Дональд Трамп у інтэрв'ю тэлеканалу CNBC. - Я раблю гэта не дзеля палітыкі, а для таго, каб рабіць правільныя крокі для нашай краіны".
Паводле даных Бюро перапісу насельніцтва ЗША, у 2017 годзе аб'ём увозу кітайскіх тавараў у ЗША склаў $505,5 млрд у параўнанні са $129,9 млрд экспарту амерыканскіх тавараў у Кітай.
Узаемныя павышаныя мытныя пошліны паміж ЗША і Кітаем уступілі ў сілу 6 ліпеня 2018 года. ЗША ўвялі пошліну 25 працэнтаў на імпарт 818 найменняў тавараў з Кітая агульным аб'ёмам $34 млрд у год. У якасці контрмеры Кітай у гэты ж дзень увёў пошліну 25 працэнтаў на імпарт раўназначнага аб'ёму амерыканскіх тавараў.-0-
