Трамп уводзіць 100-працэнтныя пошліны на замежнае кіно

5 мая, Мінск /Кар. БЕЛТА/. ЗША ўводзяць мытныя пошліны ў памеры 100 працэнтаў на замежны кінематограф. Аб гэтай заяве амерыканскага лідара Дональда Трампа паведамляе ТАСС.

Паводле ацэнкі прэзідэнта ЗША, амерыканская кінаіндустрыя вельмі хутка памірае. "Іншыя краіны прапануюць разнастайныя стымулы, каб пераманіць нашых кінематаграфістаў і студыі з ЗША. Галівуд і многія іншыя напрамкі ў ЗША разараюцца. Гэта ўзгодненыя намаганні іншых дзяржаў і, значыць, пагроза нацыянальнай бяспецы. Акрамя ўсяго іншага, гэта яшчэ і распаўсюджванне інфармацыі і прапаганды", - адзначыў ён, падкрэсліўшы, што ўпаўнаважвае міністэрства гандлю і прадстаўніка ЗША на гандлёвых перагаворах неадкладна пачаць працэс увядзення 100-працэнтнага тарыфу на ўсе фільмы замежнай вытворчасці, якія паступаюць у Штаты.

Таксама ў пачатку красавіка амерыканскі лідар аб'явіў аб увядзенні мытных пошлін на прадукцыю 185 краін і тэрыторый. Аднак 9 красавіка ён на 90 дзён прыпыніў дзеянне дадатковых імпартных пошлін, уведзеных па прынцыпе ўзаемнасці, адносна шэрага дзяржаў і тэрыторый. Паводле інфармацыі Белага дома, гэта паўза звязана з правядзеннем гандлёвых перагавораў, а ў гэты перыяд будзе дзейнічаць універсальны тарыф у памеры 10 працэнтаў.-0-