16 снежня, Мінск /Кар. БЕЛТА/. Сусветны банк аб'явіў аб выдзяленні $93 млрд на дапамогу самым бедным краінам свету ў барацьбе з распаўсюджваннем COVID-19. Аб гэтым гаворыцца ў прэс-рэлізе банка, паведамляе ТАСС.
Грошы будуць накіраваны па лініі Міжнароднай асацыяцыі развіцця - структуры ў складзе СБ. Гэта самая вялікая сума, якая калі-небудзь выдзялялася па лініі асацыяцыі за 61 год яе існавання.
Сродкі будуць размеркаваны сярод 74 самых бедных краін свету. 70 працэнтаў гэтай сумы атрымаюць краіны Афрыкі. "У гэтых краінах пандэмія павялічвае беднасць, падрывае эканамічны рост і ставіць пад пагрозу перспектывы ўстойлівага і інклюзіўнага развіцця", - адзначаецца ў паведамленні банка.
Дапамога будзе выдзяляцца ў перыяд з 1 ліпеня 2022 года па 30 чэрвеня 2025 года.-0-
