18 мая, Мінск /Кар. БЕЛТА/. Магутны цыклон, які сфарміраваўся ў Бенгальскім заліве, імкліва накіроўваецца да граніцы Індыі і Бангладэш. Сіноптыкі прагназуюць значныя разбурэнні ў дзвюх краінах, якія цяпер перажываюць успышку COVID-19, паведамляе CNN.
Цыклон "Амфан" узмацніўся да ўзроўню атлантычнага ўрагану 4-й катэгорыі або супертайфуну ў заходняй частцы Ціхага акіяна. Цяпер у зоне дзеяння цыклону фіксуюцца парывы ветру скорасцю да 240 км/гадз. Сіноптыкі прагназуюць, што шторм аслабее, перш чым дасягне дэльты ракі Ганг 20 мая.
Аднак нават калі шторм абрушыцца на бераг пасля аслаблення, ён можа нанесці значны ўрон. Прагназуецца, што "Амфан" выйдзе на бераг паблізу бедных густанаселеных раёнаў Індыі і Бангладэш. Пры гэтым, калі ён прызямліцца ў нізіннай дэльце, існуе верагоднасць утварэння моцных штармавых нагонаў вышынёй да 9 м.
Стыхійныя бедствы распаўсюджаны ў гэтай частцы свету, аднак "Амфан" можа быць першым моцным штормам, які абрушыўся на Індыю і Бангладэш ва ўмовах надзвычайнай сітуацыі ў галіне аховы здароўя. Па стане на раніцу 18 мая ў Бангладэш пацверджана больш за 22 тыс. выпадкаў COVID-19 і 328 смяротных выпадкаў. У Індыі налічвалася больш за 96 тыс. заражаных COVID-19 і больш за 3 тыс. смярцей. У абедзвюх краінах тэмпы распаўсюджвання каранавіруса новага тыпу яшчэ не запаволіліся. Улады Індыі і Бангладэш асцерагаюцца значнага росту заражэнняў, паколькі ў густанаселеных эвакуацыйных цэнтрах, якія арганізуюць у сувязі з набліжэннем супертайфуну, складана захоўваць сацыяльнае дыстанцыраванне і прытрымлівацца строгіх правіл гігіены.
Шторм можа прынесці праліўныя дажджы ў горад Кокс-Базар (Бангладэш), дзе знаходзіцца буйнейшы ў свеце лагер бежанцаў. На гэты момант там пражывае амаль 1 млн чалавек. На мінулым тыдні ў лагеры былі зафіксаваны першыя выпадкі COVID-19, і ў сувязі з надыходзячым стыхійным бедствам улады прагназуюць значны рост захваральнасці.
Нацыянальныя сілы рэагавання на стахійныя бедствы Індыі (NDRF) накіравалі 10 каманд у штат Адзіша і сем - у Заходнюю Бенгалію, каб пачаць там эвакуацыю. Яшчэ 20 каманд NDRF знаходзяцца ў рэжыме чакання.-0-
