10 снежня, Мінск /Кар. БЕЛТА/. Сёння раніцай адбылася стральба ў бальніцы чэшскага горада Острава. У выніку чатыры чалавекі загінулі, яшчэ два сур'ёзна паранены, паведамляе чэшскі партал навін Novinky.cz.
Стральба была чуваць у хірургічнай клініцы каля 7.00 па мясцовым часе. Як расказаў міністр аховы здароўя Чэхіі Адам Войцах, два чалавекі загінулі адразу, яшчэ два памерлі пазней ад атрыманых ран. Не ўдакладняецца, ці былі загінулыя пацыентамі клінікі.
Паліцыя займаецца вышукам злачынца. Гэта мужчына сярэдніх гадоў, ростам прыкладна 180 см, апрануты ў чырвоную куртку.
На месцы знаходзяцца спецыяльныя паліцэйскія падраздзяленні і спецыялісты службы выратавання, а таксама ў раён здарэння накіраваўся паліцэйскі верталёт. У бліжэйшы час у Остраве пройдзе пасяджэнне крызіснага штаба.
Частку пацыентаў клінікі эвакуіравалі, некаторым было загадана заставацца ў сваіх палатах. Прылеглы да бальніцы ўніверсітэт часова закрылі. Іншыя падрабязнасці пакуль не прыводзяцца.-0-
