27 студзеня, Мінск /Кар. БЕЛТА/. НАТА пры неабходнасці можа за некалькі дзён развярнуць у краінах альянсу ў Чарнаморскім рэгіёне перадавы атрад Сіл рэагавання колькасцю 5 тыс. чалавек. Аб гэтым заявіў генеральны сакратар альянсу Енс Столтэнберг, прадстаўляючы адказ НАТА на прапановы Расіі па бяспецы, паведамляе ТАСС.
"НАТА спадзяецца на дээскалацыю ва Украіне і прапануе Расіі дыялог, але паралельна павышае гатоўнасць сваіх сіл і прысутнасць у Чарнаморскім рэгіёне і на ўсходзе альянсу, - падкрэсліў Енс Столтэнберг. - Перадавы атрад Сіл рэагавання НАТА ў складзе 5 тыс. чалавек на чале з Францыяй у выпадку неабходнасці можа быць развернуты ў рэгіёне на працягу некалькіх дзён".
Паводле слоў Енса Столтэнберга, НАТА цвёрда верыць, што напружанасць і рознагалоссі павінны быць вырашаны шляхам дыялогу і дыпламатыі. "Не шляхам выкарыстання сілы або пагрозы яе прымянення", - сказаў Столтэнберг.
Ён чарговы раз паўтарыў, што НАТА "назірае канцэнтрацыю сіл вакол Украіны, дзе ўжо знаходзяцца больш за 100 тыс. чалавек, і дадатковыя сілы на падыходзе, уключаючы значнае размяшчэнне ваенных у Беларусі". Енс Столтэнберг таксама заявіў, што альянс назірае значную колькасць сучасных узбраенняў, уключаючы найноўшыя самалёты і комплексы ППА С-400.
Расія і Беларусь цяпер рыхтуюцца да правядзення буйных манеўраў "Саюзная рашучасць - 2022" на тэрыторыі Беларусі.
МЗС РФ 17 снежня 2021 года апублікаваў расійскія праекты пагадненняў аб гарантыях бяспекі, якія расійскі бок чакае ад Вашынгтона і НАТА. Дакументы прадугледжваюць сярод іншага адмову ад пашырэння НАТА на ўсход, у тым ліку адмову ад прыняцця ў яе склад Украіны, а таксама ўвядзенне абмежаванняў на размяшчэнне сур'ёзных наступальных узбраенняў, у прыватнасці ядзерных. 26 студзеня ЗША і НАТА перадалі Расіі свае пісьмовыя адказы на прапановы Масквы па бяспецы.-0-
