26 студзеня, Мінск /Кар. БЕЛТА/. Эксперты пачалі расшыфроўваць чорныя скрыні збітага Іл-76. Аб гэтым інфармуе ТАСС са спасылкай на даныя аператыўных службаў.
Адзначаецца, што два бартавыя самапісцы (параметрычны і моўны) расійскага борта Іл-76, які рухнуў на тэрыторыі Белгародскай вобласці, прывезены ў ваенную лабараторыю ў расійскай сталіцы.
Спецыялісты пачалі ўжо работу з бартавымі самапісцамі. Стан чорных скрынь здавальняючы, яны прыдатныя для расшыфроўкі, з іх капіруецца ўся інфармацыя.
У аператыўных службах таксама сказалі, што па справе аб крушэнні самалёта правядуць некалькі экспертыз, у тым ліку авіяцыйна-тэхнічную, трасалагічную, судова-медыцынскую і выбуховатэхнічную.
Ваенны самалёт Іл-76 быў збіты 24 студзеня ўкраінскімі сіламі ў Белгародскай вобласці Расіі. На яго борце знаходзіліся 74 чалавекі, у тым ліку 65 украінскіх палонных для абмену. Усе яны загінулі. Паводле інфармацыі Мінабароны Расіі, борт быў збіты з ЗРК, што знаходзіўся ў Харкаўскай вобласці. Радыёлакацыйныя сродкі ВКС РФ зафіксавалі пуск дзвюх украінскіх ракет, якія збілі самалёт. Як заявілі ў Мінабароны РФ, украінскі бок ведаў, што 24 студзеня будзе ажыццёўлена перавозка ўкраінскіх палонных. Следчы камітэт РФ па факце крушэння Іл-76 узбудзіў справу аб тэракце.
Расія зробіць усё для таго, каб адказныя за крушэнне ваеннага самалёта Іл-76 панеслі заслужанае пакаранне, заявіў першы намеснік пастаяннага прадстаўніка Расіі пры ААН Дзмітрый Палянскі на пасяджэнні Савета Бяспекі ААН, скліканым РФ з-за крушэння Іл-76.
Генштаб УСУ ўскосна прызнаў, што Іл-76 з палоннымі збілі ўкраінскія сілы. СБУ адкрыла справу па факце катастрофы, яна кваліфікавана па артыкуле аб парушэнні законаў і звычаяў вайны. У ЗША заявілі, што высвятляюць дэталі інцыдэнту. Там таксама правяраюць даныя аб тым, што для паражэння расійскага самалёта ўкраінскімі ваеннымі была выкарыстана амерыканская зброя. Дзярждэп чакае ад РФ і Украіны расследавання абставін здарэння. Пры гэтым у Дзярждэпартаменце сцвярджаюць, што Вашынгтон ніякім чынам не мае дачынення да надзвычайнага здарэння.-0-
