4 чэрвеня, Мінск /Кар. БЕЛТА/. Расійскай вакцынай ад каранавіруса "Спадарожнік V" у Венгрыі вакцынавалі мільён грамадзян. Аб гэтым заявіў кіраўнік МЗС Венгрыі Петэр Сіярта ў інтэрв'ю газеце "Известия" на Пецярбургскім міжнародным эканамічным форуме, інфармуе ТАСС.
"Расійская вакцына карыстаецца вялікай папулярнасцю сярод венграў - 1 млн нашых грамадзян вакцынаваны "Спадарожнікам V", - сказаў Петэр Сіярта.
Кіраўнік МЗС Венгрыі адзначыў, што прымяненне расійскай вакцыны стала вялікім крокам на шляху да паспяховай кампаніі вакцынацыі. "Яна дапамагла нам стаць першай еўрапейскай краінай, якая адкрылася", - падкрэсліў ён і дадаў, што пасля вакцынацыі "Спадарожнікам V" адчувае сябе выдатна.
Колькасць насельніцтва Венгрыі, паводле даных улад краіны, у 2021 годзе складае 9,730 млн чалавек. Па стане на 3 чэрвеня ў краіне атрымалі хаця б адну дозу вакцыны 5 227 318 чалавек, паведамляецца на сайце Кабміна Венгрыі, прысвечаным барацьбе з пандэміяй.
У лістападзе 2020 года Венгрыя стала першай краінай ЕС, куды былі дастаўлены ўзоры вакцыны "Спадарожнік V" для правядзення даследаванняў. У лютым 2021 года расійскі прэпарат быў канчаткова адобраны венгерскай профільнай установай аховы здароўя і пачалося яго прымяненне для вакцынацыі насельніцтва. Акрамя расійскай вакцыны ў Венгрыі прымяняюць прэпараты вытворчасці амерыканскай кампаніі Pfizer і яе германскага партнёра BioNTech, амерыканскіх фірм Moderna і Johnson & Johnson, а таксама AstraZeneca.-0-
