ДЗЯРЖОРГАНЫДЗЯРЖОРГАНЫ
Флаг Нядзеля, 28 лістапада 2021
Мінск +1°C
Усе навіны
Усе навіны
У свеце
06 кастрычніка 2021, 11:52

СМА папярэдзіла аб набліжэнні маштабнага воднага крызісу

Фота ААН
Фота ААН

6 кастрычніка, Мінск /Кар. БЕЛТА/. Чалавецтву неабходна ўсвядоміць, што набліжаецца маштабны водны крызіс. Такое папярэджанне змешчана ў дакладзе Сусветнай метэаралагічнай арганізацыі (СМА), паведамляецца на сайце Цэнтра навін ААН.

У дакладзе "Стан кліматычнага абслугоўвання ў 2021 годзе: водныя рэсурсы" прагназуецца ў бліжэйшым будучым рэзкае павелічэнне колькасці людзей, якія церпяць ад недахопу вады. Пры гэтым, гаворыцца ў дакуменце, прыкладаемыя міжнароднай супольнасцю намаганні ў галіне кіравання, маніторынгу, прагназавання і ранняга папярэджання нездавальняючыя і маюць фрагментарны характар.

"Павышэнне тэмпературы вядзе да змянення характару ападкаў на глабальным і рэгіянальным узроўнях, што выклікае змяненне рэжыму выпадання ападкаў, зрушэнне сельскагаспадарчых сезонаў і ўплывае на здароўе і агульны дабрабыт людзей, у тым ліку забеспячэнне прадуктамі харчавання", - заявіў генеральны сакратар Сусветнай метэаралагічнай арганізацыі Петэры Таалас.

Ён нагадаў пра праліўныя дажджы ў Азіі і маштабныя паводкі ў Японіі, Кітаі, Інданезіі, Непале, Пакістане і Індыі, у выніку якіх мільёны мясцовых жыхароў былі вымушаны пакінуць свае дамы, сотні людзей загінулі. Такія тэндэнцыі характэрныя цяпер не толькі для краін, што сталі на шлях развіцця, - катастрафічныя паводкі ў Еўропе сталі прычынай соцень смерцяў і нанеслі значны ўрон эканоміцы рэгіёна.

Надзвычайныя сітуацыі, звязаныя з вадой, за апошнія 20 гадоў сталі адбывацца ў свеце значна часцей. З 2000 года колькасць стыхійных бедстваў, звязаных з паводкамі, у параўнанні з двума папярэднімі дзесяцігоддзямі павялічылася на 134 працэнты. Найбольшая колькасць смерцяў і эканамічных страт, звязаных з паводкамі, адбываецца ў Азіі, дзе, на думку аўтараў даклада, неабходна тэрмінова ўмацаваць комплексныя сістэмы папярэджвання аб рачных паводках.

Колькасць і працягласць засух на Зямлі за той жа перыяд павялічыліся на 29 працэнтаў. Большасць смерцяў, звязаных з засухамі, рэгістравалася ў Афрыцы.

"Недахоп вады, - дадаў Петэры Таалас, - прадаўжае заставацца сур'ёзнай прычынай для непакою ў многіх краінах і асабліва ў Афрыцы. У дзяржавах, якія адчуваюць недахоп вады, цяпер жывуць больш за мільярд чалавек. Гэтыя людзі церпяць ад адсутнасці доступу да бяспечнай пітной вады і сродкаў санітарыі. Нам неабходна ў поўнай меры ўсвядоміць надыходзячы водны крызіс".

Згодна з прыведзенымі ў дакладзе данымі, у 2018 годзе 3,6 млрд чалавек не мелі належнага доступу да вады на працягу як мінімум месяца. Чакаецца, што да 2050 года гэты паказчык вырасце прыкладна да 5 млрд.

За апошнія 20 гадоў глабальныя запасы водных рэсурсаў, інакш кажучы, аб'ём усёй вады на паверхні зямлі і пад зямлёй, у тым ліку вільгаць глебы, снег і лёд, змяншаюцца са скорасцю адзін сантыметр у год. Найбольшыя страты фіксуюцца ў Антарктыдзе і Грэндандыі, але і многія густанаселеныя рэгіёны ў больш нізкіх шыротах перажываюць значныя страты вады і пагаршэнне водазабеспячэння. Сітуацыя ўскладняецца яшчэ і тым, што толькі 0,5 працэнта водных рэсурсаў Зямлі прыдатныя для выкарыстання ў якасці пітной вады.

Інтэграванае кіраванне воднымі рэсурсамі жыццёва важна для дасягнення доўгатэрміновага сацыяльнага, эканамічнага і экалагічнага дабрабыту, гаворыцца ў справаздачы. Між тым 75 краін свету паведамілі аб тым, што эфектыўнасць выкарыстання водных рэсурсаў у іх ніжэйшая за сярэднюю, прычым 10 дзяржаў прызналі вельмі нізкі ўзровень гэтага паказчыка. Для дасягнення паказчыкаў, закладзеных у Парадку дня развіцця да 2030 года, неабходна паскорыць цяперашнія тэмпы адаптацыі як мінімум у чатыры разы.

Эксперты Сусветнай метэаралагічнай арганізацыі рэкамендуюць укладаць больш сродкаў у комплекснае кіраванне воднымі рэсурсамі, у сістэмы ранняга папярэджвання засухі і паводкі, а таксама паляпшаць метады збору і апрацоўкі інфармацыі. Акрамя таго, яны прапануюць каардынаваць работу розных службаў, якія займаюцца гэтымі пытаннямі, і заклікаюць краіны ўступаць у арганізаваную СМА Кааліцыю па водных рэсурсах і клімаце.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі