24 лютага, Мінск /Кар. БЕЛТА/. Сітуацыя з распаўсюджваннем каранавіруснай інфекцыі ў краінах СНД стабілізуецца, паведамляецца на сайце Расспажыўнагляду.
"У цэлым у краінах СНД адзначаецца стабілізацыя сітуацыі са зніжэннем новых выпадкаў захворвання на COVID-19, чаму садзейнічае падтрыманне высокіх паказчыкаў тэсціравання, выкананне прафілактычных мер і сацыяльнай дыстанцыі, а таксама старт прышчэпачнай кампаніі супраць новай каранавіруснай інфекцыі", - гаворыцца ў паведамленні, апублікаваным па выніках пасяджэння Каардынацыйнага савета па праблемах санітарнай аховы тэрыторый краін СНД ад завозу і распаўсюджвання асабліва небяспечных інфекцыйных хвароб.
Таксама адзначаецца, што на фоне паступовага аднаўлення трансгранічнага перамяшчэння важна выкарыстоўваць сучасныя інструменты санітарна-каранціннага кантролю, у прыватнасці мабільныя дадаткі, што забяспечваюць перадачу вынікаў тэсціравання ў электронным выглядзе. Такія рашэнні паспяхова ўжо прымяняюцца ў Расіі і шэрагу іншых краін СНД.-0-
