13 чэрвеня, Мінск /Кар. БЕЛТА/. Рызыка выкарыстання ядзернай зброі цяпер дасягнула максімуму з перыяду халоднай вайны ў сувязі з актыўным нарошчваннем арсеналаў краінамі "ядзернага клуба". Гэта вынікае з даклада Стакгольмскага міжнароднага інстытута даследавання праблем міру (SIPRI), паведамляе ТАСС.
У дакладзе адзначаецца, што на гэты момант можна назіраць "выразныя прыкметы таго, што працэс скарачэння ядзерных узбраенняў закончыўся", а "ўсе дзяржавы, якія ўваходзяць у "ядзерны клуб" (Расія, ЗША, Вялікабрытанія, Францыя, Кітай, Індыя, Пакістан, Ізраіль і КНДР) павялічваюць колькасць боегаловак і праводзяць мадэрнізацыю ядзерных арсеналаў".
Даследчыкі падкрэсліваюць, што да павышэння напружанасці прыводзіць у тым ліку ўзмацненне ролі атамнай зброі ў ваенных стратэгіях краін. Сітуацыя таксама абвастраецца значным пагаршэннем адносін паміж сусветнымі дзяржавамі.
На думку аналітыкаў SIPRI, у хуткім часе, упершыню пасля заканчэння халоднай вайны, у свеце адбудзецца істотнае павелічэнне ядзерных арсеналаў. Пры гэтым удакладняецца, што такая тэндэнцыя можа стаць доўгатэрміновай і захоўвацца на працягу ўсяго наступнага дзесяцігоддзя.-0-
