17 студзеня, Мінск /Кар. БЕЛТА/. Свет павінен адмовіцца ад менталітэту халоднай вайны, ад рыторыкі, якая раздувае нянавісць і забабоны. Аб гэтым сёння на віртуальнай дыскусіі "Давоскі парадак дня" заявіў старшыня КНР Сі Цзіньпін, паведамляе ТАСС.
"Мы павінны адкінуць менталітэт халоднай вайны і імкнуцца да мірнага суіснавання, да адносін узаемнай выгады", - сказаў кітайскі лідар. "Наш свет сёння зусім не спакойны, распаўсюджваецца рыторыка, якая раздувае нянавісць і забабоны", - адзначыў ён. Старшыня КНР звярнуў увагу на дзеянні некаторых краін і колаў, накіраваныя на стрымліванне, падаўленне або канфрантацыю, якія ставяць пад удар глабальны мір і бяспеку.
"Гісторыя пацвярджае зноў і зноў, што канфрантацыя не вырашае праблемы, яна толькі можа мець катастрафічныя наступствы", - падкрэсліў Сі Цзіньпін.-0-
