22 чэрвеня, Пекін /БЕЛТА - Сіньхуа/. Старшыня КНР Сі Цзіньпін на цырымоніі адкрыцця Дзелавога форуму БРІКС заявіў, што адвольнае ўвядзенне санкцый прынясе бедствы людзям па ўсім свеце.
Старшыня КНР назваў санкцыі "бумерангамі" і адзначыў, што тыя, хто палітызуе сусветную эканоміку, выкарыстоўваюць сваё панаванне ў міжнароднай фінансавай і валютнай сістэмах і адвольна прымяняюць санкцыйныя меры, тым самым наносячы ўрон не толькі іншым народам, але і сабе.
"Цяпер некаторыя ключавыя вытворчыя ланцужкі і ланцужкі паставак наўмысна ўскладняюцца, цэны на сыравіну вагаюцца на высокіх узроўнях, ва ўсім свеце высокая інфляцыя, міжнародныя фінансавыя рынкі застаюцца нестабільнымі, а імпульс аднаўлення сусветнай эканомікі пастаянна слабее", - падкрэсліў Сі Цзіньпін, дадаўшы, што ў гэты крытычны момант можна пераадолець крызісы, толькі аб'яднаўшыся.
Акрамя таго, паводле слоў Сі Цзіньпіна, гісторыя паказала, што гегемонія, блокавая палітыка і канфрантацыя не прыносяць ні міру, ні бяспекі, а вядуць, наадварот, да войнаў і канфліктаў. У сувязі з чым лідар КНР яшчэ раз заклікаў міжнародную супольнасць процістаяць гегемоніі і блокавай палітыцы і пачаць выбудоўваць міжнародныя адносіны, заснаваныя на ўзаемнай павазе, раўнапраўі і ўзаемавыгадным супрацоўніцтве.-0-
