30 кастрычніка, Мінск /Кар. БЕЛТА/. У сувязі са значным ростам колькасці выпадкаў заражэння каранавіруснай інфекцыяй Швецыя ўводзіць каранцінныя абмежаванні для трох рэгіёнаў - Стакгольма, Вестра-Гёталанда і Эстэргётланда, паведамляе The Local.
Раней строгія абмежавальныя меры былі прыняты для Упсалы і Сконе.
Улады настойліва рэкамендуюць жыхарам рэгіёнаў з непаспяховай эпідэміялагічнай сітуацыяй устрымацца ад наведвання супермаркетаў, музеяў, бібліятэк, басейнаў, трэнажорных залаў і іншых грамадскіх месцаў. Дазваляюцца паходы ў магазін за прадуктамі або ў аптэку. Таксама грамадзян заклікаюць не арганізоўваць вечарынкі з сябрамі і максімальна ізаляваць усе кантакты. Таксама раяць устрымацца ад наведвання публічных мерапрыемстваў, канцэртаў, спартыўных трэніровак.
Што датычыцца магазінаў і спартыўных цэнтраў, то іх уладальнікі павінны паклапаціцца аб тым, каб у памяшканнях не знаходзілася адначасова вялікая колькасць наведвальнікаў. Работадаўцам рэкамендуюць па магчымасці перавесці работнікаў на дыстанцыйную работу, праводзіць нарады ў анлайн-фармаце, адмяніць камандзіроўкі.
Паводле даных на 30 кастрычніка, у Швецыі за ўвесь час зарэгістравана 121 тыс. выпадкаў заражэння каранавіруснай інфекцыяй, памерлі 5934 чалавекі. Прырост новых выпадкаў каранавіруса за апошнія суткі склаў амаль 2,8 тыс.-0-