13 снежня, Мінск /Кар. БЕЛТА/. Канцлер ФРГ Олаф Шольц дапускае магчымасць аднаўлення супрацоўніцтва з Расіяй у сферы эканомікі пасля завяршэння канфлікту ва Украіне. Аб гэтым паведамляе ТАСС са спасылкай на агенцтва DPA.
Шольц адзначыў, што Расія па-ранейшаму будзе самай вялікай краінай у Еўропе і пасля заканчэння крызісу, звязанага з сітуацыяй ва Украіне. Ён лічыць, што таму трэба рыхтавацца да будучага развіцця падзей.
Канцлер ФРГ таксама канстатаваў, што пасля заканчэння ўзброеных дзеянняў Расія і яе грамадзяне будуць мець патрэбу ў эканамічным супрацоўніцтве з іншымі краінамі. Аднак гэта адбудзецца потым, цяпер жа санкцыі адносна Расіі будуць узмацняцца, сказаў кіраўнік германскага ўрада.-0-
