13 мая, Мінск /Кар. БЕЛТА/. Савет Бяспекі ААН па выніках праведзенага экстраннага пасяджэння не змог узгадніць сумесную заяву па абвастрэнні канфлікту паміж Палесцінай і Ізраілем. Адзіную заяву не атрымліваецца выпрацаваць з-за пазіцыі ЗША, паведамляе ТАСС са спасылкай на дыпламатычныя крыніцы ў СБ.
"Як і на праведзеных у панядзелак кансультацыях, заяву выпрацаваць не ўдалося. Гэтаму перашкаджае пазіцыя ЗША", - паведаміў субяседнік агенцтва.
Як паведаміў ТАСС першы намеснік пастаяннага прадстаўніка Расіі пры ААН Дзмітрый Палянскі, у час сустрэчы "краіны - члены СБ ААН выказалі крайнюю занепакоенасць, заклікалі ўстрымацца ад насілля". "Аднак пакуль не ўсе краіны аказаліся гатовыя да фармулёўкі пазіцыі ў выглядзе сумеснага дакумента", - пацвердзіў ён, адказваючы на адпаведнае пытанне.
У сваю чаргу афіцыйны прадстаўнік генеральнага сакратара ААН Стэфан Дзюжарык заявіў, што ў сакратарыяце арганізацыі "хацелі ўбачыць моцнае і адзінае пасланне ад Савета Бяспекі". "Кожны выпадак прымянення сілы павінен быць прааналізаваны і расследаваны. Грамадзянскія асобы не павінны станавіцца мэтай ракетных атак", - дадаў ён.-0-