28 сакавіка, Мінск /Кар. БЕЛТА/. Украінскія ўлады маюць намер падаць у суд на заходнія краіны, якія не адмовіліся ад імпарту расійскай нафты. Аб гэтым заявіў саветнік прэзідэнта Украіны Уладзіміра Зяленскага па пытаннях эканомікі Алег Усценка ў інтэрв'ю брытанскаму тэлеканалу Sky News, паведамляе ТАСС.
Алег Усценка назваў непрымальным той факт, што Еўрасаюз не далучыўся да нафтавых санкцый супраць Расіі. "Увесь цывілізаваны свет спрабуе спыніць гэту вайну, у той жа час (некаторыя краіны. - Заўвага ТАСС) адпраўляюць грошы на яе фінансаванне", - заявіў саветнік прэзідэнта Украіны.
Пасля пачатай Расіяй 24 лютага ваеннай спецаперацыі ва Украіне шэраг заходніх дзяржаў, уключаючы Вялікабрытанію і ЗША, адмовіліся ад імпарту расійскай нафты і нафтапрадуктаў. ЕС прамога эмбарга на расійскія вуглевадароды не ўводзіў з меркаванняў энергабяспекі. У той жа час шэраг еўрапейскіх нафтагазавых кампаній аб'явілі аб разрыве сувязей з расійскімі партнёрамі, выходзе з сумесных праектаў або аб адмове ад інвестыцый у будучыя праекты.-0-
