27 жніўня, Мінск /Кар. БЕЛТА/. Савет Бяспекі ААН асудзіў тэракты ў Кабуле 26 жніўня, паведамляе ТАСС.
У Савеце Бяспекі адзначылі, што выканаўцы, арганізатары і спонсары тэрактаў ля аэрапорта Кабула павінны быць прыцягнуты да адказнасці.
Як паведамляе тэлекампанія CBS, колькасць ахвяр тэракта ў Кабуле павялічылася да 170. У Пентагоне пацвердзілі, што сярод ахвяр 13 амерыканскіх ваенных, яшчэ 18 пацярпелі.
26 жніўня каля будынка аэрапорта Кабула адбыліся два выбухі, учыненыя тэрарыстамі-смяротнікамі. Радыкальны рух "Талібан", што захапіў уладу ў Афганістане, рашуча асудзіў тое, што адбылося і паабяцаў прыцягнуць вінаватых да адказнасці.
Прэзідэнт ЗША Джо Байдэн заявіў, што ў поўнай меры нясе адказнасць за апошнія падзеі ў Афганістане. Амерыканская разведка лічыць, што тэракт учынілі смяротнікі групоўкі "Ісламская дзяржава". Прэзідэнт ЗША удакладніў, што загадаў ваенным распрацаваць планы ўдараў па аб'ектах і кіраўніцтве афганскага аддзялення ІД. Амерыканскі лідар лічыць, што талібы не дапамагалі баевікам у арганізацыі тэракта.-0-