26 красавіка, Мінск /Кар. БЕЛТА/. Антырасійскія санкцыі могуць стаць прычынай недахопу персаналу пры ажыццяўленні міжнародных грузавых і пасажырскіх перавозак. Аб гэтым паведамляе ТАСС са спасылкай на японскую газету Yomiuri.
Паводле даных выдання, сёння ў міжнародных марскіх перавозках задзейнічана больш за 198 тыс. расійскіх маракоў, што складае дзясятую частку марскога персаналу ў свеце. Расіяне традыцыйна карысталіся вялікім попытам з боку суднаходных кампаній, у тым ліку з краін ЕС.
Аднак з-за антырасійскіх санкцый наймаць расійскіх маракоў становіцца ўсё цяжэй. Напрыклад, з-за абмежаванняў на палёты грамадзянскай авіяцыі маракі не могуць дабрацца да замежных партоў, дзе яны могуць паступіць на работу. Таксама з-за абмежаванняў грашовых пераводаў стала значна цяжэй выплачваць зарплату расійскім маракам.
Такім чынам, у выпадку адмовы ад расійскага персаналу суднаходныя кампаніі могуць сутыкнуцца з дэфіцытам рабочай сілы, што паўплывае на работу галіны.-0-
