ДЗЯРЖОРГАНЫДЗЯРЖОРГАНЫ
Флаг Субота, 4 снежня 2021
Мінск -3°C
Усе навіны
Усе навіны
У свеце
20 кастрычніка 2021, 14:50

СААЗ заявіла аб эфектыўнасці вакцынацыі цяжарных супраць COVID-19

Фота з архіва
Фота з архіва

20 кастрычніка, Мінск /Кар. БЕЛТА/. Вакцынацыя цяжарных супраць COVID-19 эфектыўная, заявіла тэхнічны спецыяліст аддзела вакцынакіруемых захворванняў і імунізацыі Еўрапейскага рэгіянальнага бюро СААЗ Людміла Мосіна ў час вэбінара "СМІ супраць COVID-19", перадае карэспандэнт БЕЛТА.

Цяпер узровень вакцынацыі цяжарных супраць COVID-19 недастатковы ва ўсім свеце, сказала Людміла Мосіна. Яна адзначыла, што цяжарныя не былі ўключаны ў першапачатковыя клінічныя выпрабаванні, якія праводзіліся для вакцын супраць кавіда. Таму першапачаткова СААЗ не рэкамендавала вакцынацыю цяжарных жанчын, за выключэннем тых, якія мелі вельмі высокую рызыку інфіцыравання, напрыклад медработнікаў, якія працуюць з хворымі на COVID-19.

"Аднак пасля пачатку пандэміі прайшоў час, у нас сабралася вельмі вялікая колькасць даных аб рызыцы COVID-19 для цяжарных жанчын. Быў праведзены метааналіз даных 192 апублікаваных даследаванняў, і на падставе гэтых даных мы ведаем, што вельмі высокая рызыка развіцця цяжкіх форм захворвання ў цяжарных жанчын, якія хворыя на COVID-19, у параўнанні з жанчынамі такога ж рэпрадуктыўнага ўзросту, але якія не з'яўляюцца цяжарнымі", - сказала Людміла Мосіна.

Паводле яе слоў, у цяжарных больш як у 2 разы вышэйшая рызыка таго, што яна будзе змешчана ў палату інтэнсіўнай тэрапіі, амаль у 3 разы вышэйшая рызыка смерці і амаль у 2,5 раза вышэйшая рызыка таго, што спатрэбіцца штучная вентыляцыя. Больш таго, ёсць даныя 42 даследаванняў, што ўключалі сотні цяжарных жанчын, хворых на кавід, якія расказалі аб негатыўных наступствах для плода. Устаноўлена, што рызыка дачаснага нараджэння дзіцяці ў гэтым выпадку вышэйшая ў 1,8 раза, а рызыка таго, што дзецям спатрэбіцца інтэнсіўнае лячэнне, вышэйшая больш як у 3,5 раза.

"На падставе гэтых даных СААЗ перагледзела свае рэкамендацыі. Таксама ў нас з'явіліся першыя даныя з ЗША і Ізраіля, дзе пачалі прышчэпліваць цяжарных. Вынікі прадэманстравалі, што вакцына добра пераносіцца цяжарнымі жанчынамі і няма ніякай дадатковай рызыкі, а таксама што вакцынацыя эфектыўная", - сказала тэхнічны спецыяліст аддзела. Яна дадала, што антыцелы пасля вакцынацыі выявіліся і ў малацэ маці. Такім чынам, гэта ўскосна пацвярджае, што вакцынацыя маці можа ахоўваць і дзіця.

"Сусветная арганізацыя аховы здароўя цяпер рэкамендуе вакцынацыю цяжарных у краінах, дзе карысць ад вакцынацыі перавышае любыя патэнцыяльныя рызыкі. Цяпер у нас няма інфармацыі аб нейкіх рызыках для цяжарных", - рэзюмавала Людміла Мосіна.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі