1 чэрвеня, Мінск /Кар. БЕЛТА/. Лячэнне неінфекцыйных захворванняў ускладнілася з пачатку пандэміі каранавіруса. Аб гэтым сведчыць новае даследаванне, вынікі якога апублікаваны Сусветнай арганізацыяй аховы здароўя, паведамляе ТАСС.
Даследаванне, праведзенае ў 155 краінах на працягу трох тыдняў у маі, пацвердзіла, што праблемы назіраюцца па ўсім свеце, аднак найбольш пацярпелымі з'яўляюцца краіны з нізкім узроўнем даходаў насельніцтва. Сітуацыя выклікае сур'ёзную занепакоенасць у арганізацыі, паколькі людзі, якія церпяць ад неінфекцыйных захворванняў, падпадаюць пад больш высокую рызыку цяжкага ходу хваробы на COVID-19.
"Рэзультаты даследавання пацвярджаюць тое, што мы чулі ад многіх краін на працягу апошніх некалькіх тыдняў, - адзначыў генеральны дырэктар СААЗ Тэдрас Гебрэесус. - Многія людзі, якія маюць патрэбу ў лячэнні такіх хвароб, як рак, сардэчна-сасудзістыя захворванні і дыябет, не атрымліваюць неабходныя медыцынскія паслугі і лякарствы з пачатку пандэміі каранавіруса".
Асноўная выснова спецыялістаў, што аказанне паслуг у сферы аховы здароўя было поўнасцю або часткова спынена ў многіх краінах. Так, згодна з даследаваннем, больш як у палавіне дзяржаў (53 працэнты) была прыпынена дапамога людзям, якія церпяць ад гіпертаніі; у 49 працэнтах краін - дыябетыкам і людзям, якія церпяць ад ускладненняў, выкліканых дыябетам; у 42 працэнтах краін - хворым на рак, у 31 працэнце краін - людзям, якія церпяць ад сардэчна-сасудзістых захворванняў. Асноўнымі прычынамі сталі недахоп персаналу (паколькі многія супрацоўнікі былі кінуты на барацьбу з COVID-19), прыпыненне работы грамадскага транспарту і недахоп лякарстваў, дыягнастычных сродкаў і медыцынскага абсталявання.
Акрамя таго, апытанне паказала, што ў 63 працэнтах краін было парушана прадастаўленне паслуг па рэабілітацыі, хоць яна з'яўляецца адным з ключавых элементаў аднаўлення пацыентаў, якія перанеслі COVID-19 у цяжкай форме.
"Вельмі важна, каб краіны маглі знайсці інавацыйныя падыходы для прадаўжэння аказання паслуг па лячэнні неінфекцыйных захворванняў нават у час барацьбы з COVID-19", - падкрэсліў Тэдрас Гебрэесус, каменціруючы рэзультаты даследавання.-0-
