27 снежня, Мінск /Кар. БЕЛТА/. Новыя прэпараты супраць COVID-19 значна павялічаць шанцы на выжыванне цяжкіх пацыентаў, якія заразіліся новым каранавірусам, заявіў ТАСС кіраўнік Еўрапейскага рэгіянальнага бюро Сусветнай арганізацыі аховы здароўя (СААЗ) Ханс Клюге.
"Я натхнёны новымі процівіруснымі прэпаратамі, якія, магчыма, з'явяцца на рынку ў 2022 годзе, што значна павялічыць шанцы на выжыванне пацыентаў, якія трапяць у бальніцу з цяжкім COVID-19", - адзначыў Ханс Клюге.
Ён таксама падкрэсліў, што вакцыны наступных пакаленняў будуць больш эфектыўнымі супраць новых штамаў, якія будуць з'яўляцца ў свеце. "Я не магу прадказваць будучыню. Але трэба адзначыць, што цяперашнія вакцыны - гэта вакцыны ад COVID-19 першага пакалення. Будучыя вакцыны будуць дапрацаваны і адаптаваны да новых варыянтаў, што зробіць іх больш эфектыўнымі. Гэта падобна да таго, што адбываецца ўжо з вакцынамі супраць грыпу, якія адаптуюцца да новых штамаў амаль кожны год", - растлумачыў кіраўнік Еўрапейскага рэгіянальнага бюро СААЗ.-0-
