26 мая, Мінск /Кар. БЕЛТА/. Сусветная арганізацыя аховы здароўя накіруе місію ў Кітай з мэтай вывучэння паходжання каранавіруса, аднак тэрміны наведвання пакуль не вызначаны. Аб гэтым заявіў на брыфінгу дырэктар праграмы СААЗ па надзвычайных сітуацыях у галіне аховы здароўя Майкл Раян, паведамляе ТАСС.
"Мы знаходзімся ў працэсе абмеркавання з нашымі калегамі з Кітая, - адзначыў Майкл Раян. - Наколькі я разумею, пакуль канкрэтная дата навуковай місіі не вызначана. Але мы чакаем больш хуткай магчымасці яе правядзення з удзелам навуковых прадстаўнікоў з розных краін". Задача місіі будзе заключацца ў тым, каб зразумець паходжанне віруса. "Прыемна адзначыць сігнал з Кітая, што краіна адкрыта да такога падыходу", - дадаў дырэктар праграмы.
"Усе бакі разумеюць важнасць даследавання паходжання віруса, - падкрэсліў са свайго боку генеральны дырэктар СААЗ Тэдрас Гебрэесус. - Паколькі шляхам вывучэння паходжання віруса мы зможам папярэдзіць яго з'яўленне ў будучым".
У сваю чаргу эксперт СААЗ Марыя ван Керкхове адзначыла, што адной з галоўных задач для вучоных на сёння з'яўляецца выяўленне прамежкавага носьбіта. "Мы вітаем магчымасць прыцягнення міжнароднай супольнасці, каб зразумець паходжанне віруса і ўзаемадзеянне паміж жывёлай і чалавекам", - сказаў яна.
Раней міністр замежных спраў, член Дзяржсавета КНР Ван І заявіў, што кітайскі ўрад падтрымлівае міжнародны і бесстаронні разбор адносна абставін паходжання каранавіруса і прычын пандэміі на базе СААЗ і навуковага падыходу.-0-
