10 лютага, Мінск /Кар. БЕЛТА/. Штам каранавіруса (VOC-202012/01), які вызначаецца больш высокай заразнасцю, зафіксаваны першапачаткова ў Вялікабрытаніі, быў выяўлены на мінулым тыдні яшчэ ў шасці краінах, і іх агульная колькасць дасягнула 86. Пашырылася таксама геаграфія распаўсюджвання штамаў, выяўленых першапачаткова ў ПАР (501Y.V2), у Бразіліі і Японіі (P.1), паведамляе ТАСС са спасылкай на Сусветную арганізацыю аховы здароўя.
У яе штотыднёвым эпідэміялагічным бюлетэні адзначаецца, што штам 501Y.V2 прысутнічаў па стане на 8 лютага ў 44 дзяржавах, за мінулы тыдзень іх стала на тры больш. Штам P.1 распаўсюдзіўся на працягу сямі дзён у пяці новых дзяржавах, і цяпер такіх налічваецца 15.
У студзені СААЗ заявіла: узнікненне новых варыянтаў каранавіруса было чаканым, паколькі вірусам уласціва пастаянна змяняцца. Камітэт СААЗ па надзвычайнай сітуацыі на пасяджэнні 14 студзеня заклікаў краіны пашырыць навуковыя даследаванні геномной паслядоўнасці муціруючых узбуджальнікаў выклікаемага каранавірусам захворвання, а таксама дзяліцца інфармацыяй з іншымі дзяржавамі.
Паводле даных СААЗ, разнавіднасць каранавіруса VOC-202012/01 з'явілася ў Вялікабрытаніі ў верасні мінулага года. У ПАР штам 501Y.V2 прысутнічае з пачатку жніўня, а ў Бразіліі і Японіі штам P.1 цыркулюе са снежня.-0-
