9 лютага, Мінск /Кар. БЕЛТА/. Сусветная арганізацыя аховы здароўя (СААЗ) зарэгістравала за суткі 376,5 тыс. новых выпадкаў заражэння каранавірусам ва ўсім свеце. Гэта стала адным з самых нізкіх паказчыкаў сутачнага прыросту з 21 кастрычніка, паведамляе ТАСС.
Менш выпадкаў захворвання - 369,3 тыс. - было выяўлена толькі 2 лютага, тады як у студзені паказчыкі перавышалі адзнаку 700 тыс. новых выпадкаў у дзень, а некалькі разоў - нават 800 тыс.
Усяго ў свеце, паводле даных СААЗ, за перыяд пандэміі выяўлена 105,8 млн выпадкаў заражэння, у 21 краіне зарэгістравана больш за 1 млн інфіцыраваных.
У рэгіёне Паўночнай і Паўднёвай Амерыкі, які застаецца эпіцэнтрам успышкі каранавіруса (прыкладна 45 працэнтаў ад агульнасусветнай колькасці выпадкаў заражэння), запаволенне тэмпаў распаўсюджвання інфекцыі назіраецца ў большасці дзяржаў. Так, у ЗША (27,09 млн інфіцыраваных) у апошнія дні рэгіструецца па 90-100 тыс. хворых, што адпавядае паказчыкам пачатку лістапада. Гэта ўтрая менш пікавых значэнняў пачатку студзеня.
У Калумбіі (2,16 млн) за мінулыя суткі выявілі 4,2 тыс. інфіцыраваных - мінімальны паказчык з сярэдзіны ліпеня. Захваральнасць за студзень знізілася ў пяць разоў.
Больш як двухразовае зніжэнне паказчыкаў - з 13 тыс. інфіцыраваных за суткі ў студзені да 5-6 тыс. у першыя дні лютага - назіраецца ў Аргенціне (усяго 1,98 млн тых, хто заразіўся).
У Мексіцы (1,93 млн інфіцыраваных) за апошнія два тыдні, паводле даных Міністэрства аховы здароўя, захваральнасць знізілася на 32 працэнты.
Выключэнне з агульнай тэндэнцыі - Перу (1,19 млн), дзе пасля трохмесячнага плато назіраецца трэці ўсплёск захваральнасці.
У еўрапейскім рэгіёне, на які прыпадае больш як трэць ад агульнасусветнай колькасці інфіцыраваных, зніжэнне захваральнасці назіраецца амаль ва ўсіх краінах з найбольшай колькасцю хворых. Так, у Вялікабрытаніі (3,95 млн інфіцыраваных) за апошнія сем дзён колькасць рэгіструемых у краіне выпадкаў скарацілася на чвэрць у параўнанні з папярэднім сямідзённым перыядам. А ў параўнанні з пікавымі значэннямі студзеня (больш за 60 тыс. выпадкаў заражэння у суткі) захваральнасць знізілася ў чатыры разы.
У Іспаніі (2,99 млн інфіцыраваных) у канцы студзеня выяўлялі больш за 40 тыс. выпадкаў заражэння ў суткі, цяпер ў два разы менш, аднак паказчыкі застаюцца аднымі з самых высокіх у Еўропе.
У Германіі (2,29 млн) пік захваральнасці прыпаў на сярэдзіну снежня (звыш 30 тыс. інфіцыраваных у суткі), пасля чаго пачалося паступовае зніжэнне да ўзроўню 5-6 тыс., што адпавядае кастрычніцкім значэнням.
У Францыі (3,34 млн інфіцыраваных) ужо больш як месяц фіксуюць па 20 тыс. тых, хто заразіўся, штодзённа (за выключэннем выхадных дзён, калі статыстычныя службы працуюць з няпоўнай нагрузкай).
Падобная сітуацыя і ў Італіі (2,64 млн інфіцыраваных), дзе са студзеня захваральнасць трымаецца на адзнацы 12-15 тыс. інфіцыраваных у суткі - утрая менш у параўнанні з максімальнымі значэннямі лістапада.
У рэгіёне Азіі (прыкладна 15 працэнтаў ад агульнасусветнай колькасці выпадкаў заражэння) эпіцэнтрам успышкі каранавіруса застаецца Індыя (10,84 млн інфіцыраваных), пры гэтым тэмпы распаўсюджвання інфекцыі ўстойліва зніжаюцца: у лютым у краіне рэгістравалася па 10-11 тыс. хворых у суткі, тады як у студзені сярэдні сутачны паказчык складаў каля 17 тыс., а ў апошні тыдзень снежня - прыкладна 21 тыс.
У Турцыі (2,54 млн) пасля снежаньскіх максімумаў (больш за 30 тыс. выпадкаў заражэння ў суткі) захваральнасць з пачатку студзеня трымаецца на ўзроўні 8 тыс., што адпавядае значэнням сярэдзіны лістапада.
На плато выйшаў Іран (1,47 млн) - там ужо амаль месяц фіксуюць амаль 7 тыс. хворых кожны дзень. У снежні выяўлялі ўдвая больш тых, хто заразіўся.
У ПАР (1,47 млн) пасля студзеньскіх пікаў (звыш 20 тыс. выпадкаў заражэння ў суткі) захваральнасць упала да ўзроўню 2,5-4 тыс., што адпавядае паказчыкам пачатку снежня.-0-