20 кастрычніка, Мінск /Кар. БЕЛТА/. Расія ў выпадку падаўжэння Дагавора аб мерах па далейшым скарачэнні і абмежаванні стратэгічных наступальных узбраенняў (ДСНУ) на год гатова разам з амерыканскім бокам замарозіць колькасць ядзерных боезарадаў на гэты тэрмін пры адсутнасці дадатковых патрабаванняў ЗША, паведамляе ТАСС.
"Расія прапануе падоўжыць ДСНУ на адзін год і пры гэтым гатова разам з ЗША ўзяць на сябе палітычнае абавязацельства аб тым, каб замарозіць на названы перыяд колькасць існуючых у бакоў ядзерных боезарадаў. Гэта пазіцыя можа быць рэалізавана строга і выключна пры тым разуменні, што замарозка боезарадаў не будзе суправаджацца ніякімі дадатковымі патрабаваннямі з боку ЗША", - гаворыцца ў заяве МЗС РФ.
У МЗС таксама дадалі, што ў выпадку пагаднення з Вашынгтонам на гэтых падставах выйграны ў выніку падаўжэння ДСНУ час можна будзе выкарыстаць для комплексных двухбаковых перагавораў аб будучым кантролі над ракетна-ядзернымі ўзбраеннямі з абавязковым разглядам усіх фактараў, якія ўплываюць на стратэгічную стабільнасць.
Адзначаецца, што Масква пакуль не атрымлівала ад Вашынгтона афіцыйнага адказу на прапанову прэзідэнта РФ Уладзіміра Пуціна падоўжыць ДСНУ на год. У дыпведамстве адзначылі, што ЗША пакуль абмежаваліся асобнымі каментарыямі службовых асоб у сацсетках, Масква разлічвае на афіцыйны адказ Вашынгтона.
Раней Уладзімір Пуцін прапанаваў без усялякіх умоў падоўжыць тэрмін дзеяння ДСНУ хаця б на год. Прэзідэнт РФ даручыў міністру замежных спраў Расіі Сяргею Лаўрову паспрабаваць у бліжэйшы час атрымаць ад ЗША адказ. У сваю чаргу памочнік прэзідэнта ЗША па нацыянальнай бяспецы Роберт О'Браен назваў ініцыятыву Уладзіміра Пуціна "асуджанай на правал".
ЗША і Расія падпісалі дагавор аб ДСНУ ў 2010 годзе. Згодна з яго ўмовамі, кожны з бакоў скарачае свае стратэгічныя наступальныя ўзбраенні. Дагавор застаецца ў сіле на працягу 10 гадоў (да 5 лютага 2021 года), калі не будзе заменены да гэтага тэрміну наступным пагадненнем. Ён таксама можа быць падоўжаны не больш як на пяць гадоў (гэта значыць да 2026 года) па ўзаемнай згодзе бакоў.-0-
