21 снежня, Мінск /Кар. БЕЛТА/. Расія павінна развіваць ваеннае і ваенна-тэхнічнае супрацоўніцтва з краінамі ШАС і АДКБ, умацоўваць бяспеку Саюзнай дзяржавы Расіі і Беларусі. Аб гэтым прэзідэнт РФ Уладзімір Пуцін заявіў, выступаючы на пашыраным пасяджэнні калегіі Мінабароны, паведамляе ТАСС.
"Ва ўмовах складанай міжнароднай абстаноўкі неабходна развіваць ваеннае і ваенна-тэхнічнае супрацоўніцтва з дзяржавамі - членамі ШАС і АДКБ, асаблівую ўвагу ўдзяляць умацаванню абараназдольнасці Саюзнай дзяржавы Расіі і Беларусі", - сказаў прэзідэнт РФ.
Уладзімір Пуцін выказаў занепакоенасць Масквы наконт набліжэння НАТА да граніц Расіі. "У сувязі з гэтым прапанаваў прэзідэнту ЗША пачаць перагаворы па выпрацоўцы канкрэтных дамоўленасцей. Дарэчы кажучы, на самай справе ён (Джо Байдэн. - Заўвага ТАСС) у ходзе размовы прапанаваў назначыць адказных работнікаў па гэтым напрамку", - паведаміў Уладзімір Пуцін.
Прэзідэнт РФ растлумачыў, што Масква хоча атрымаць менавіта юрыдычна абавязваючыя гарантыі бяспекі ад ЗША ў сувязі з набліжэннем НАТА да граніц Расіі. "Нам патрэбны доўгатэрміновыя, юрыдычна абавязваючыя гарантыі", - падкрэсліў Уладзімір Пуцін.
"Але мы з вамі добра ведаем: нельга верыць ніякім юрыдычным гарантыям, таму што Злучаныя Штаты лёгка выходзяць з усіх міжнародных дагавораў, якія ім па той ці іншай прычыне становяцца нецікавымі. Лёгка! Тлумачачы нечым або наогул нічым не тлумачачы, як гэта было з дагаворам аб проціракетнай абароне", - адзначыў расійскі лідар.
Уладзімір Пуцін таксама заявіў, што маніпуляцыі Захаду палажэннямі міжнароднага права надакучылі. "Яны ж, мы з вамі добра ведаем, пад рознымі падставамі, у тым ліку з мэтай забяспечыць сваю ўласную бяспеку, дзейнічаюць за тысячы кіламетраў ад сваёй нацыянальнай тэрыторыі. І калі ім перашкаджаюць міжнароднае права і статут ААН, аб'яўляюць гэта ўсё ўстарэлым, непатрэбным, а калі адпавядае нешта іх інтарэсам, адразу спасылаюцца на нормы міжнароднага права, на статут ААН, на гуманітарнае права міжнароднае і гэтак далей", - сказаў Уладзімір Пуцін. "Гэтыя маніпуляцыі надакучылі", - дадаў ён.
Прэзідэнт Расіі растлумачыў пашырэнне НАТА на Усход эйфарыяй, якую заходнія краіны адчулі пасля халоднай вайны, і няправільным аналізам сітуацыі з іх боку. Ён нагадаў аб дзеяннях Захаду, якія былі ажыццёўлены ў 1990-я - пачатку 2000-х гадоў і стваралі праблемы для Расіі.
"Часам задаешся пытаннем - а навошта яны гэта ўсё рабілі ў тых умовах? Незразумела. Я думаю, што ад эйфарыі ў сувязі з перамогай у так званай халоднай вайне або з так званай перамогай у халоднай вайне. І з няправільнай ацэнкі сітуацыі на той момант часу і няправільнага аналізу магчымых варыянтаў развіцця сітуацыі", - сказаў Уладзімір Пуцін. "Вось з-за гэтага. Іншых прычын проста няма", - упэўнены ён.
Расія гатова прымаць ваенна-тэхнічныя меры ў выпадку набліжэння НАТА да расійскіх граніц, заявіў Уладзімір Пуцін. "У выпадку прадаўжэння відавочна агрэсіўнай лініі заходніх калег мы будзем прымаць адэкватныя ваенна-тэхнічныя меры, на недружалюбныя крокі жорстка рэагаваць", - сказаў кіраўнік дзяржавы.-0-
