26 снежня, Санкт-Пецярбург /Кар. БЕЛТА/. Нефармальны саміт СНД сведчыць аб імкненні краін Садружнасці і далей выбудоўваць супрацоўніцтва ў духу павагі і партнёрства. Аб гэтым заявіў Прэзідэнт Расіі Уладзімір Пуцін на нефармальным саміце СНД, перадае карэспандэнт БЕЛТА.
Кіраўнік расійскай дзяржавы выказаў удзячнасць лідарам краін СНД за прынятае запрашэнне на традыцыйную нефармальную пераднавагоднюю сустрэчу. "Тое, што мы яшчэ раз сабраліся ў такім сяброўскім асяроддзі, красамоўна сведчыць аб нашым імкненні і далей разам выбудоўваць супрацоўніцтва на прасторы СНД у духу сапраўднага стратэгічнага партнёрства, узаемнай выгады і ўліку інтарэсаў усіх краін", - сказаў Уладзімір Пуцін. Гаворачы аб парадку дня сустрэчы, ён прапанаваў падвесці вынікі адыходзячага 2022 года, абмеркаваць планы на перспектыву і хвалюючыя ўсіх пытанні рэгіянальнага і міжнароднага парадку дня.
Паводле ацэнкі Прэзідэнта Расіі, узаемадзеянне краін СНД у 2022 годзе развівалася паспяхова, што пацвярджае ўстойлівы рост тавараабароту: за студзень - кастрычнік ён павялічыўся на 6,6 працэнта да $81,5 млрд. "Ёсць падставы разлічваць, што па выніках бягучага года ён дасягне $100 млрд, - звярнуў увагу ён. - Усё гэта адбываецца на фоне няпростай сітуацыі, выкліканай валацільнасцю на глабальных рынках, неспрыяльнай сусветнай эканамічнай кан'юнктурай, а таксама санкцыйным націскам з боку некаторых краін".
Паводле слоў расійскага лідара, краіны СНД сталі больш актыўна пераходзіць на нацыянальныя валюты ва ўзаемных разліках. "Па лініі Садружнасці прымаліся скаардынаваныя меры, нацэленыя на імпартазамяшчэнне і забеспячэнне тэхнічнага суверэнітэту, самастойнасці, нарошчвання сумеснай прамысловай вытворчасці і навуковага патэнцыялу. Як вынік - умацаваўся эканамічны і фінансавы суверэнітэт дзяржаў Садружнасці, дынамічна развіваліся ўнутраныя рынкі тавараў, паслуг і капіталаў, паглыбілася рэгіянальная інтэграцыя", - адзначыў Уладзімір Пуцін.
Яшчэ адным ключавым напрамкам супрацоўніцтва ў СНД ён назваў умацаванне бяспекі і стабільнасці ў еўразійскім рэгіёне. "На жаль, выклікі і пагрозы ў гэтай галіне, перш за ўсё звонку, з кожным годам толькі растуць. Даводзіцца прызнаць, на жаль, і тое, што паміж дзяржавамі - удзельніцамі Садружнасці таксама ўзнікаюць рознагалоссі. Галоўнае, аднак, што мы гатовы і будзем супрацоўнічаць. І нават калі ўзнікаюць якія-небудзь праблемныя пытанні, імкнёмся вырашаць іх самі, разам, разам, аказваючы адзін аднаму таварыскую дапамогу і пасрэдніцкае садзейнічанне", - заявіў расійскі лідар.
Менавіта ў такім рэчышчы краіны СНД узаемадзейнічаюць па тэматыцы барацьбы з тэрарызмам і экстрэмізмам, трансгранічнай злачыннасцю, незаконным абаротам наркотыкаў і карупцыяй. У гэтым годзе цесныя аператыўныя кантакты па-ранейшаму падтрымліваюцца паміж органамі нацыянальнай бяспекі і спецслужбамі, іншымі структурамі, якія адказваюць за забеспячэнне правапарадку і ўнутранай стабільнасці.
Што датычыцца захавання адзінай гуманітарнай прасторы, пашырэння разнастайных абменаў паміж грамадзянамі, Уладзімір Пуцін асабліва адзначыў аб'яднальную сілу рускай мовы. Ён нагадаў, што раней было прынята рашэнне правесці ў Садружнасці ў 2023-м Год рускай мовы і ў сувязі з гэтым падрыхтавана шырокая праграма.
Прэзідэнт Расіі выказаў упэўненасць, што паглыбленне ўзаемадзеяння ў СНД адпавядае карэнным інтарэсам народаў краін Садружнасці, дапамагае эфектыўней вырашаць задачы сацыяльна-эканамічнага развіцця і ўмацоўваць рэгіянальную стабільнасць і бяспеку.
"Яшчэ раз дзякую вам за тое, што адгукнуліся на запрашэнне прыехаць у Санкт-Пецярбург. Гэта было агульнае жаданне, але ўсё ж такі фармальна гэта ініцыятыва Расіі. І я вам удзячны за яе падтрымку. Ад душы віншую з надыходзячым Новым годам. Жадаю вам, вашым родным, блізкім, грамадзянам вашых краін здароўя, шчасця, дабрабыту і працвітання", - дадаў расійскі лідар.
Пасля кароткага выступлення Прэзідэнта Расіі слова ўзяў Прэзідэнт Казахстана Касым-Жамарт Такаеў. Улічваючы, што Казахстан старшынстваваў у СНД у 2022 годзе, ён падвёў вынікі гэтага перыяду, абазначыў найбольш актуальныя задачы па развіцці супрацоўніцтва ў рамках Садружнасці.
Паводле яго слоў, што датычыцца стварэння спрыяльных умоў для гандлю, трэба прадметна працаваць над устараненнем тарыфных і нетарыфных бар'ераў, недапушчэннем пратэкцыянізму. Неабходна наладзіць узаемадзеянне ў пытаннях харчовай бяспекі. Патрэбны і новыя механізмы і фарматы супрацоўніцтва для павышэння эфектыўнасці транспартна-лагістычных праектаў на прасторы СНД.
Асабліва Касым-Жамарт Такаеў звярнуў увагу на ўзаемадзеянне ў сферы бяспекі, сумесную барацьбу з тэрарызмам і экстрэмізмам. А для адаптацыі арганізацыі да сучасных глабальных рэалій нам трэба ўдасканальваць яе патэнцыял, узмацняць пазіцыі Садружнасці на міжнароднай арэне.
Пасля гэтага кіраўнікі дзяржаў разам накіраваліся да месца правядзення нефармальнага абеду ад імя Уладзіміра Пуціна ў гонар лідараў краін СНД.-0-
