14 кастрычніка, Мінск /Кар. БЕЛТА/. Еўразійскі банк развіцця ў бліжэйшыя пяць гадоў сумарна інвесціруе каля $11 млрд. Як паведамляе ТАСС, аб гэтым заявіў расійскі лідар Уладзімір Пуцін на саміце Расія - Цэнтральная Азія, які праходзіць у Астане.
Паводле яго слоў, Еўразійскі банк развіцця садзейнічае падтрымцы нацыянальных эканомік удзельнікаў ЕАЭС. Сукупны аб'ём яго інвестыцый за наступныя пяць гадоў складзе каля $11 млрд.
Уладзімір Пуцін адзначыў, што Масква зацікаўлена ў падключэнні краін Цэнтральнай Азіі да расійскіх праграм імпартазамяшчэння. Ён выказаў упэўненасць, што такое супрацоўніцтва пойдзе на карысць развіццю эканомік, набыццю новых кампетэнцый. Паводле яго слоў, цяпер вельмі запатрабаваны сапраўды скаардынаваныя сумесныя крокі як па нарошчванні саюзніцтва і стратэгічнага партнёрства, так і па павышэнні ўстойлівасці эканомік.
Таксама расійскі лідар заявіў, што РФ гатова аказаць практычную дапамогу ў аднаўленні аб'яднанай энергасістэмы Цэнтральнай Азіі, што ў выніку павысіць энергетычную бяспеку ўсіх краін рэгіёна. Размова ідзе аб партнёрстве ў стварэнні генерыруючых магутнасцей, узвядзенні АЭС, укараненні лічбавых тэхналогій.-0-
