14 лістапада, Мінск /Кар. БЕЛТА/. Прэзідэнты ЗША і Філіпін асуджаюць ядзерную праграму КНДР і заклікаюць іншыя краіны прыняць меры па зніжэнні ўзроўню супрацоўніцтва з гэтай краінай. Аб гэтым гаворыцца ў сумеснай заяве Дональда Трампа і Радрыга Дутэртэ, апублікаванай сёння па выніках іх сустрэчы, паведамляюць інфармагенцтвы.
Як адзначаецца ў дакуменце, лідары дзвюх дзяржаў настойліва заклікалі ўсе краіны, у тым ліку членаў Асацыяцыі дзяржаў Паўднёва-Усходняй Азіі (АСЕАН), выказаць сваю апазіцыю і прыняць меры па зніжэнні дыпламатычнага і эканамічнага ўзаемадзеяння з КНДР. Прэзідэнт ЗША Дональд Трамп у сваю чаргу даў высокую ацэнку дзеянням Філіпін па выкананні адпаведных рэзалюцый Савета Бяспекі ААН па КНДР.
Прэзідэнт Філіпін на саміце АСЕАН таксама сустрэўся з прэм'ер-міністрам Японіі Сіндза Абэ. Дутэртэ выказаў сваю падтрымку кіраўніку японскага Кабінета міністраў адносна пазіцыі, якую займае Токіа па пытанні ядзернай праграмы Пхеньяна.
31-ы саміт АСЕАН, а таксама звязаныя з ім мерапрыемствы, уключаючы сустрэчы з партнёрамі па дыялогу, праходзяць на Філіпінах з 10 па 14 лістапада. У АСЕАН уваходзяць 10 краін - Бруней, В'етнам, Інданезія, Малайзія, Сінгапур, Тайланд, Філіпіны, Камбоджа, Лаос і М'янма - дзяржавы з агульным насельніцтвам больш як 600 млн чалавек.-0-