16 жніўня, Джакарта /БЕЛТА - АНТАРА/. Прэзідэнт Інданезіі Джока Відода выступіў перад парламентам з афіцыйнай прапановай аб пераносе сталіцы дзяржавы з горада Джакарта на востраў Калімантан.
"Я хацеў бы папрасіць дазволу і падтрымкі ў парламента і жыхароў Інданезіі, каб перанесці сталіцу на востраў Калімантан", - сказаў прэзідэнт у сваім выступленні.
Джока Відода запэўніў прысутных, што новая сталіца будзе не толькі сімвалам краіны, але і прадэманструе прагрэс інданезійскага народа ў яго імкненні да эканамічнай роўнасці і справядлівасці. Аднак кіраўнік дзяржавы не ўдакладніў, які менавіта горад стане новай сталіцай Інданезіі.
Ідэя пераносу сталіцы была агучана прэзідэнтам Джока Відода ў канцы красавіка гэтага года ў сувязі з перанасяленнем, эканамічнымі праблемамі і ўстарэлай інфраструктурай Джакарты. На думку ўлад Інданезіі, Джакарта, у якой пражываюць амаль 10 млн чалавек, вельмі перагружана, каб забяспечваць эфектыўную работу ўрада. Чакаецца, што перанос стане стымулам для развіцця эканомікі рэгіёнаў за межамі густанаселенага вострава Ява. Міністэрства планавання нацыянальнага развіцця Інданезіі падлічыла, што перанос сталіцы абыдзецца прыкладна ў $32,5 млрд. Пачатак будаўніцтва запланаваны на 2021 год.-0-
