27 кастрычніка, Мінск /Кар. БЕЛТА/. Глабальныя патокі прамых замежных інвестыцый у першай палавіне 2020 года знізіліся на 49 працэнтаў у параўнанні з тым жа перыядам 2019-га. На інвестыцыйныя праекты негатыўна паўплывалі пандэмія і каранцін, а таксама выкліканая імі рэцэсія. Аб гэтым гаворыцца ў новым дакладзе Канферэнцыі ААН па гандлі і развіцці (ЮНКТАД), паведамляе Цэнтр навін ААН.
Спад закрануў усе асноўныя формы прамых замежных інвестыцый. Колькасць новых інвестыцыйных праектаў знізілася на 37 працэнтаў, зліццяў і паглынанняў - на 15 працэнтаў, а колькасць здзелак па трансгранічным фінансаванні праектаў, якія з'яўляюцца важнай крыніцай інвестыцый у інфраструктуру, скарацілася на 25 працэнтаў.
Значнае скарачэнне аб'ёмаў інвестыцый назіралася ў дзяржавах з развітой эканомікай. Так, напрыклад, прамыя замежныя інвестыцыі ў краіны Паўночнай Амерыкі скараціліся на 56 працэнтаў і склалі $68 млрд.
У Азіі - галоўным чынам за кошт высокіх паказчыкаў Кітая - зніжэнне прамых замежных інвестыцый склала ўсяго 12 працэнтаў. Аб'ёмы замежных інвестыцый у краіны з пераходнай эканомікай скараціліся на 81 працэнт з-за рэзкага спаду ў Расіі.
"Перспектывы застаюцца вельмі няпэўнымі, яны будуць залежаць ад працягласці крызісу ў сферы аховы здароўя і ад эфектыўнасці палітычных мер па змякчэнні эканамічных наступстваў пандэміі. Нявызначанасць таксама абумоўлена геапалітычнымі рызыкамі", - гаворыцца ў дакладзе ЮНКТАД.-0-