26 лістапада, Мінск /Кар. БЕЛТА/. Акруговая пракуратура Варшавы пачала расследаванне ў дачыненні да ўдзельнікаў жаночых пратэстаў супраць змяненняў у закон аб абортах, паведамляе польская інфармацыйная служба RMF24.
У прыватнасці, пратэстуючыя могуць быць абвінавачаны ў сувязі са зневажальнымі выказваннямі, публічнымі заклікамі да супрацьпраўных дзеянняў, а таксама выказваннямі ў падтрымку нападзення на каталіцкія храмы.
Асобнае расследаванне звязана з парушэннем удзельнікамі пратэстаў абмежаванняў, уведзеных у сувязі з эпідэміяй каранавіруса. "Размова ідзе аб падазрэнні ў стварэнні небяспечных умоў для жыцця і здароўя многіх людзей... у час масавых сходаў, што праходзілі ў кастрычніку 2020 года", - паведамілі ў пракуратуры.
Між тым у Польшчы прад'яўляюцца абвінавачванні і за размяшчэнне інфармацыі аб пратэстах у сацсетках. Так, нядаўна паліцыя накіравала ў суд справу 14-гадовага Мацея Р. з горада Крапкавіцы, які размясціў у сваім акаўнце пост аб акцыі пратэсту жанчын супраць дзяржаўнай палітыкі, арганізаванай у гэтым горадзе. Пасля публікацыі падлетка наведалі супрацоўнікі паліцыі, прыгразіўшы яму 8 гадамі турмы за арганізацыю незаконнага сходу. У абарону хлопчыка выступіў Упаўнаважаны па грамадзянскіх правах Польшчы. У выніку суд прыняў рашэнне не ўзбуджаць справу, аднак рашэнне не канчатковае і можа быць абскарджана.
Раней паведамлялася, што нацыянальны пракурор Польшчы Багдан Свянчкоўскі падрыхтаваў дапаможнік для следчых аб тым, як абыходзіцца з арганізатарамі пратэстаў. У дакуменце, які быў разасланы ва ўсе рэгіянальныя пракуратуры краіны, Багдан Свянчкоўскі, у прыватнасці, загадвае следчым прыцягнуць да адказнасці арганізатараў пратэстаў, а таксама падбухторшчыкаў.
22 кастрычніка Канстытуцыйны суд Польшчы прыняў рашэнне аб тым, што дазволены польскім заканадаўствам аборт па прычыне паталогіі плода супярэчыць галоўнаму закону краіны. Пасля гэтага па Польшчы прайшла хваля пратэстаў, тысячы людзей выйшлі на вуліцы вялікіх і малых гарадоў краіны, адстойваючы свае правы.-0-
