28 верасня, Мінск /Кар. БЕЛТА/. Еўрасаюз можа аслабіць некаторыя абмежавальныя меры адносна Расійскай Федэрацыі. Аб гэтым паведамляе ТАСС са спасылкай на газету Politico.
Паводле даных выдання, у ЕС могуць прыняць рашэнне аб адмене забароны на транспарціроўку ўгнаенняў, цэменту і іншай прадукцыі, вырабленай у Расіі.
Пры гэтым такія ўступкі звязаны з тым, што Брусель спрабуе дабіцца ад Мальты, Грэцыі і Кіпра падтрымкі рашэння аб увядзенні абмежаванняў на транспарціроўку танкерамі нафты з РФ. Аслабіўшы санкцыі супраць некаторых іншых тавараў з РФ, ЕС плануе кампенсаваць гэтым краінам страты ад забароны на марскія перавозкі нафты.
Politico таксама паведаміла, што Еўракамісія сёння мае намер агучыць прапановы па чарговым пакеце антырасійскіх санкцый. Таксама чакаецца, што ЕК выступіць з прапановай аб увядзенні ліміту цэн на нафту з Расіі.
Раней Bloomberg паведамляў, што ў Бруселі на фоне энергакрызісу вывучаюць магчымасць аслабіць некаторыя санкцыі супраць РФ. У прыватнасці, можа быць дазволена транспарціроўка расійскага вугалю, угнаенняў, драўніны і некаторых вырабаў з цэменту. Між тым Польшча і краіны Балтыі не падтрымліваюць ініцыятывы аб змякчэнні санкцый.-0-
