24 студзеня, Мінск /Кар. БЕЛТА/. Заявы НАТА аб павелічэнні кантынгенту і сцягванне сіл і сродкаў на ўсходні фланг узмацняюць напружанасць у сферы бяспекі, заявіў прэс-сакратар прэзідэнта Расіі Дзмітрый Пяскоў, паведамляе ТАСС.
"Што датычыцца канкрэтных дзеянняў, мы бачым з вамі заявы, якія публікуе Паўночнаатлантычны альянс аб павелічэнні кантынгенту, і сцягванне сіл і сродкаў на ўсходні фланг. Усё гэта прыводзіць да таго, што напружанасць расце", - сказаў прадстаўнік Крамля ў размове з журналістамі.
"Я хачу звярнуць увагу, што ўсё гэта адбываецца не з-за таго, што робім мы, Расія. Гэта ўсё адбываецца з-за таго, што робяць НАТА, Злучаныя Штаты, і за кошт той інфармацыі, якую яны распаўсюджваюць", - падкрэсліў Дзмітрый Пяскоў.
Ён таксама адзначыў, што рост напружанасці ў сферы бяспекі абумоўлены інфармацыйнай істэрыкай, укідамі і канкрэтнымі дзеяннямі, якія робяцца ЗША і НАТА. "Мы ў цэлым канстатуем і хочам звярнуць вашу ўвагу на тое, што эскалацыя напружанасці ажыццяўляецца за кошт інфармацыйных дзеянняў і канкрэтных дзеянняў, якія прымаюць Злучаныя Штаты Амерыкі і НАТА, - падкрэсліў прадстаўнік Крамля. - Гаворачы аб інфармацыйнай дзейнасці, я маю на ўвазе тую інфармацыйную істэрыку, сведкамі якой мы з'яўляемся. Яна шчодра абрамлена вялікай колькасцю лжывай інфармацыі, проста хлуснёй - маю на ўвазе тыя самыя фэйкі".
Ён адзначыў, што актыўнасць НАТА каля граніц Расіі не можа ігнаравацца расійскімі ваеннымі. "Такія дзеянні і павышаная актыўнасць НАТА паблізу нашых граніц не могуць ігнаравацца нашымі ваеннымі, якія нясуць адказнасць за бяспеку нашай краіны", - адзначыў прадстаўнік Крамля.
Пры гэтым пытанне, ці можна лічыць удзел караблёў Балтыйскага флоту ў вучэннях рэакцыяй на перакідку сіл НАТА ва Усходняй Еўропе і краінах Балтыі, ён прапанаваў адрасаваць у Міністэрства абароны. "Усё ж такі мае месца пастаянны працэс вучэнняў, манеўраў, ваеннага будаўніцтва, які ніколі не спыняўся і будзе далей прадаўжацца", - падкрэсліў Дзмітрый Пяскоў.
Паводле яго слоў, прэзідэнт РФ Уладзімір Пуцін прымае неабходныя меры для таго, каб бяспека і інтарэсы краіны і яе грамадзян былі забяспечаны на належным узроўні. "Менавіта мы сталі ініцыятарам перагавораў, кансультацый (па гарантыях бяспекі для РФ. - Заўвага ТАСС), і мы чакаем, што на гэтым тыдні атрымаем пісьмовыя адказы на нашы прапановы, якія прызначаны і садзейнічаюць таму, каб мы ў далейшым пазбягалі падобных напружаных сітуацый", - дадаў ён.
Паводле слоў прадстаўніка Крамля, на жаль, Расія цяпер жыве ў "агрэсіўным асяроддзі". "Мы чытаем заявы прадстаўнікоў краін НАТА, абсалютна недружалюбныя, у наш адрас. Гэта тая рэальнасць, у якой мы існуем", - рэзюмаваў Дзмітрый Пяскоў.-0-
